曾勵珍橫店探班為《巾幗梟雄之懸崖》打氣 黎耀祥常「萬歲」定欣「頂天立地」人消瘦
香港文匯報訊（記者 梁靜儀）黎耀祥橫店拍《巾幗梟雄之懸崖》瘋狂萬歲請飲嘢，第八度與胡定欣合作。胡定欣「頂天立地」忙到消瘦，與視帝祥哥再合作猶如上堂。
由騰訊視頻及無綫電視聯合出品的《巾幗梟雄之懸崖》，演員陣容包括黎耀祥（祥哥）、胡定欣、蕭正楠、羅天宇、陳曉華、李成昌、韓馬利、杜燕歌、謝雪心、莊思明等，劇組於橫店馬不停蹄進行拍攝，助理總經理（戲劇製作）曾勵珍和製作部總監（戲劇製作）徐正康日前專誠前往橫店探班，為台前幕後打氣，珍姐還自掏腰包請食飯，氣氛愉快！視帝祥哥其間亦有萬歲請大家「喝飲料」，眾人更寫上「英俊瀟灑、氣宇軒昂、玉樹臨風、全組最愛的祥哥又……又……又請大家喝飲料！」的水牌前合照，熱烈又融洽。
兩地合作獲新衝擊
祥哥透露是次拍攝行程十分緊密，差不多日日都要開工，他說：「今次冇乜時間帶佢哋（珍姐和徐生）去玩，喺最後一晚珍姐請大家食飯，佢睇咗片之後都好滿意，覺得成個製作都好唔同，既有TVB嘅特色，又有內地製作上嘅配合，好有大片嘅感覺。」
提到與胡定欣第八度合作，祥哥說：「佢都算係我喺TVB合作最多嘅女演員，所以今次合作都好有默契，大家都會一齊食個飯，工作上有啲咩都會交流吓。」至於拍攝難忘事，祥哥說：「今次同好多內地工作人員合作，畀到我好多新嘅衝擊，呢度地方比較大，個景都豐富啲，戲劇嘅效果都會加強咗，同埋監製（方駿釗）對我哋好好，佢專登安排咗啲飯盒係少啲油、鹽、糖，通常都係三菜一肉比較清淡啲，大家都食得好習慣。」在橫店工作雖然忙碌，但祥哥一有空都會出動「食好嘢」慰勞自己，祥哥日前在社交網介紹橫店港式茶餐廳，更成枱都是香港地道美食，有咖喱魚蛋、魚蓉燒賣、菠蘿包及叉燒等，相當滿足。
與祥哥再合作似上堂
定欣亦坦言日日都要開工，開工頭一個月特別忙：「我嘅銀行主景要連開十幾日，之後亦都有唔同嘅景連開幾日，第一個月真係好辛苦，冇乜點休息過，內地有說法叫『頂天立地』，即係頭場去到尾場都係你！」身材Fit爆的定欣熱愛做運動，可惜今次帶備運動裝都係物無所用，她說：「自己帶嚟嘅運動衫都冇郁過，反而一有時間盡量瞓番多啲叉電。」她指今次角色對體力、精神消耗比較大，拍攝期間消瘦不少，今次唔使做運動都消瘦了，真是開工就瘦。今次再與視帝祥哥合作，定欣坦言：「同祥哥合作咗好多次，對上一次係《公公出宮》，都隔咗一段時間，每次同佢合作都係一個學習機會，好似再上堂咁。」
