笑言望合組「Fung麥CP」 麥明詩向馮允謙催婚脫身
香港文匯報訊（記者 子棠）馮允謙（Jay Fung）和麥明詩自合拍MV後，昨日再一同為個人護理旗艦店開幕擔任剪綵嘉賓。二人笑言不介意合組「Fung麥CP」續續孖咇發展，與飛機師男友盛勁為恩愛滿瀉的麥明詩更禁不住放閃，直認與Jay都各自好甜蜜，所以也樂意與大家分享甜蜜。
Jay昨日以「綠白配」現身活動，和麥明詩外型合襯，又合拍地齊齊用大會送贈的環保袋禮物包揮灑自如地狂擺甫士，Jay解釋因為本身都經常用環保袋買餸。麥明詩聞言原本想「屈」Jay煮餐飯仔食，豈料Jay自爆：「我驚會嚇親人，其實我唔係真係識煮食，大多是烚蛋和雞胸肉，煎嘢都試過成功，但失敗居多。」麥明詩也直認做家務不是自己的強項，相對下廚，較多負責洗碗。
說到二人如此合拍，可繼合作MV後合組新CP； Jay即指最近發現到麥明詩好唱得，可出合唱歌，更想到可為對方度身創作Rap歌搞新意；麥明詩即說：「咁破格，都幾好，我未試過；仲希望我哋個新組合可長做長有。」聽到有人為他們定名為「Fung麥CP」（蜂蜜），麥明詩即和議說：「都好喎，事關我們本身各自都好甜蜜，都想帶甜蜜畀大家。」二人不知不覺間已變很老友鬼鬼，麥明詩表示已介紹了Jay給男友盛勁為認識，兩男不單止是同一星座，男友最近還不停聽Jay的新歌，但當然是因為她參演了MV，放閃道：「唔通佢鍾意Jay多過我咩！」Jay則大讚盛勁為的手很滑，平日一定用很多潤手霜；麥明詩幽默道：「呢樣我無留意，我哋平日好少拖手，多數係傾偈。」搞笑是預計哪一對會先結婚？他們即你推我讓起來，麥明詩直認都有想過結婚這回事，但始終不是一個人就可以想的，並笑着催婚Jay：「你先喇，你快啲結婚，幫我頂一頂，哈哈。」
