C君讚謝嘉怡極富幽默感
香港文匯報訊（記者 子棠）鄭詩君（C君）、黃紫恩（Jojo）和謝嘉怡（Lisa）主持的全新遊戲問答資訊節目《咁你都唔識》定於7月27日首播，雲集一堆抵死又貼地的刁鑽問題，涉及常識、飲食、文化、生活、交通及職業等多個範疇，透過問答測試嘉賓Common sense（CS）指數；而林盛斌（Bob）、 麥玲玲、麥美恩等就擔任首集嘉賓，焦點更落在綜藝王Bob的身上。Bob不時施展抵死的「大包圍」博大霧，搞到C君要跟他大玩side bet，繼而再被眾人圍攻，揚言要直播「閨房事」作反擊。
今次亦是C君首度撇甩陸永及相隔2年回歸TVB做主持，其三寸不爛之舌亦發揮得淋漓盡致，雖一度被主力負責刁難他的Jojo以一句「冇仔女嘅兩公婆，婚姻平均維持到幾多年呢？」拋窒，但亦貫徹「無聊爆肚金句王」本色，失驚無神就窒一句，麥玲玲都被他「窒」倒。而三位主持中，以Lisa最出位，「女版金剛」上身，認真作答卻傻傻分不清，還不停爆笑料聽到大家一頭霧水，令C君亦對Lisa讚不絕口：「佢參選（港姐）時我已經覺得佢相當有幽默感，佢間唔時會爆一兩句爆笑嘅；同埋佢有一種純真，嗰種純真嘅幽默對個節目非常有幫助，甚至於我自己成個節目都係睇佢，成日好期待『你有咩講呢今次？』可能會突然有一句未必啱文法同表達意思，但又有喜劇效果喺度，我覺得Lisa先至係呢個節目不可或缺元素。」
