開騷揭秘 爆阿Sa做媒人 祖兒被自信男癡纏力追
香港文匯報訊（記者 阿祖）34場《ANOTHER SIDE….JOEY•MY SECRET•LIVE》演唱會前晚於演藝學院展開，容祖兒相隔6年再於演藝學院開騷，整晚氣氛歡樂又感動，歌迷更與祖兒大合唱又一齊跳舞，令演藝學院變成了一個熱鬧大party room ，完騷後，歌迷不停叫安歌了近15分鐘才依依不捨離場。祖兒在演唱會上自爆秘密，更指好朋友蔡卓妍曾介紹異性給她，對方表現自信又積極，對祖兒展開熱烈追求，但祖兒卻對此不甚受落。
首晚是歌迷場，大家都非常投入聽祖兒呼喚，按照dress code，不少歌迷都花盡心思，扮雞、外星人、王子、金黃爆炸頭，場面歡樂搞笑。而祖兒好友蔡卓妍、師妹李幸倪（Gin Lee）等都有前來捧場。
是次演唱會分為七部分，第一部分帶大家穿梭時空分享祖兒小時候的秘密；接着再轉帶大家返回校園，跟着祖兒上學堂，聽祖兒談到小時候及讀書的故事，笑中有淚，溫馨動人；第三部分空間大轉移，10人大樂隊出場，與祖兒一同勁歌熱舞，分享她平日於錄音室的最私密空間；第四至第六部分，私密來到祖兒的內心世界，跟觀眾分享不少好歌之餘，也分享了這幾年間，為工作不得不離港生活的心聲；演唱會最後部分是點唱環節，祖兒即場抽出歌迷一早寫下希望點唱的歌曲，而歌迷亦為她準備了一個幾層的生日蛋糕，補祝她之前6月生日，大家一起大合照。
4年未踏上過香港舞台，祖兒跟觀眾打招呼時搞笑道：「熟口熟面，又係呢個地方，又係呢啲人，大家覺得我有冇變呀？」歌迷大叫：「有呀，變靚咗！」繼而她又發覺自己這麼近觀眾席，身上的短裙打底褲都被人睇到，無論她行去什麼位置，都是一樣半走光：「哎，走去邊都睇到？」觀眾即起哄：「我想睇呀！」祖兒哈哈笑說：「你又想睇？前面嗰啲開始流晒鼻血啦！哎吔，咁點呀，唔緊要啦，反正大家一家人，打底褲就係用嚟打底，就係預咗畀大家見到㗎啦。呢啲咪就係SECRET·LIVE囉！哈哈。」
收追求者自拍照嚇窒
到談及內心世界的部分，祖兒坦言，自己是一個歌手之外，另一面就是一個中女：「有事業，生活無憂，但仲係一個人吊吊揈。」她反問觀眾，擔不擔心她？然後笑道最緊張她的感情生活有沒有着落的人，應該是好朋友蔡卓妍（阿Sa）：「我同蔡卓姸感情不用介紹啦，今晚佢都有來，佢有段時間，真係好瘋狂，佢應該係全世界最希望我得到幸福嘅人，最瘋狂的日子，佢見到所有男人，都會落個啱唔啱容祖兒嘅filter，仲同我講，你咁可愛又咁搞笑，我係男人我媾你啦！對阿Sa嗰份真心、認真、熱誠，我唔想辜負佢，所以有一次佢介紹咗一位異性畀我識，咁我哋就禮貌上交換個電話之後各有各忙，我同對方只係斷斷續續text好一段日子，都係嗰啲『加油，How are you， I am fine 』之類啦，我個人好慢熱，都為禮貌，為阿Sa一番心意。」祖兒續稱：「對方呢，見我回多一兩次，就開始send自拍照畀我，報告自己生活狀況呀咁，我當時都驚一驚，但為咗尊重阿Sa，我唔識回答，都留咗個Emoji咁，點知佢竟然再努力，留言 『I miss you baby！』，嗰一刻我真係嚇死啦，『baby』後仲唔停喎！仲話不如我哋一齊試下發展！你又唔了解我，但對方不知何來的自信，竟然再同我講 『我已經睇晒你啲演唱會！好了解知我係咩人』，各位觀眾！睇完晒我演唱會DVD想同我拍拖？咁你哋由細睇到我大，我咪要同晒你哋（拍拖）？哈哈……」語畢令全場觀眾起哄拍掌大笑大叫。
完騷後，祖兒表示：「收到好多朋友恭喜我個騷咁成功，個個都大讚好睇，兼人人最後都係嗰句 『I miss you baby 』，笑死，哈哈哈。」
