考完DSE即變「社畜」 黃明德冀畢業旅行冇鬧交
香港文匯報訊（記者 阿祖）於今年的樂壇頒獎典禮上斬獲不少新人獎的黃明德（Dark）推出今年首支派台作品《會議終結者》。由於去年Dark依然是學生身份，因此去年所派的歌曲都是寫他是新人及中學生涯的點滴。踏入2023年，Dark的新人年正式結束，又剛好考完DSE，因此他的首支歌曲就着重描述他讀完書畢業後投身社會所遇到的問題。
至於MV方面，去年Dark所推出的四首歌曲當中，三首都是動畫MV，今次亦不例外，除了保留動畫部分，Dark亦會參與拍攝，更以一身「社畜」造型上陣：「得我一個真人，其他角色全部都係動畫，例如有我嘅boss、我三位同事，呢啲全部都係我自己創作，同埋都搵咗身邊人做reference。」整個概念以「打機」為主，「首先貼切返我呢個年紀鍾意打機，加上令到成件事更加有趣，就係將《會議終結者》當係一隻game，click入去有唔同嘅遊戲，最終嘅目的就係打低個boss。」
拍完MV後，Dark表示將會跟三位好友去畢業旅行，希望留有一個美好的回憶，不過同時他亦十分擔憂，不想鬧交，怕會失去三位朋友：「而我們都會有一個隆重嘅儀式，就係grad din啦，我希望可以着得靚靚仔仔，創造一個更加好嘅回憶啦。」
