拍《一舞傾城》獻出多個第一次 陳星妤演親熱戲呻難怕被指「發姣」
香港文匯報訊（記者 梁靜儀、攝影 彭子文）陳星妤（前名陳聖瑜）近日憑熱播劇《一舞傾城》而備受注視，為劇集獻出多個第一次，獻出熒幕初吻外，又要被瘋狂掌摑，並與準人夫關楚耀有床上戲。她在接受香港文匯報訪問時坦言不怕會抽離不到角色，只怕被觀眾指她「發姣」。
現年28歲的陳星妤（Yvette），2021年參選港姐有「翻版方媛」外號，賽前被視為大熱，最終大熱倒灶只得「 現場觀眾至Like佳麗」，落選後簽約TVB成為旗下藝人。出道以來以演出綜藝節目為主的Yvette，曾客串演出劇集《新四十二章》及《法言人》，戲份不多，未能令觀眾留下深刻印象，直至在近期播出的《一舞傾城》中飾演江潔兒（KK）一角而備受注視。
其角色為照顧年老體弱的母親及為弟妹供書教學，只好放棄升讀大學而「下海」在夜總會當舞小姐，並與富家子弟Marco（關楚耀飾）及青梅竹馬的俊駒（高鈞賢飾）陷入三角戀。首次演出較重戲份角色的Yvette，劇中亦不乏大膽尺度的場面，其中有一幕是被繼父王俊棠侵犯的戲份，她笑指拍這場戲好用力，因有不少肢體動作，棠哥更拍到滴汗：「因為棠哥又要趴又要擒，佢怕我唔舒服，佢仲驚過我，好大壓力，加上棠哥老婆又在場。」
重視效果 甘願被摑至耳鳴
戲中Yvette不停被人掌摑，更被摑至耳鳴：「當時我被『阿媽』摑到耳鳴，雖然事前大家有夾過，但冇諗過咁勁，不過出嚟嘅效果都唔錯，好真實。」不過拍完這場戲反而令她掌握到掌摑戲的要點，之後要拍被「正印」（吳沚默飾）掌摑時，就叫對方狠心摑落去，豈料對方比她還要驚，她笑說：「吳沚默覺得我欺騙佢，試咗三四次都唔敢落手，後尾要我叫佢『你嚟啦，你嚟啦。』佢至敢摑，都得意嘅。」
相比被掌摑戲，Yvette覺得與對手演親密戲更難，因為平日在家中睇電視睇到親熱戲都會尷尬，當自己成為戲中人都會緊張。劇中情傾關楚耀的Yvette，表示拍攝前與對方並不認識，私下亦沒有單獨約出來培養感情，只是在搭車出外景的車程中會提前對稿及在等埋位時傾偈培養感情，當然私下一大班人食飯傾偈是有的。劇中二人最終發生肉體關係，初次拍攝「愛情動作戲」，Yvette最驚不是抽離不到角色愛上對手，而是怕被觀眾指她「發姣」：「因為知道關楚耀私下同女友感情好，有時都驚自己捉唔到親密嘅程度，都驚會被人話好識發姣，可能自己諗多咗，因為未試過演呢類角色，一開始比較緊張，所以都會有呢種周邊壓力。」她又多謝劇組為免她尷尬，拍攝時都有清場。
稱下巴變尖 全因一個意外
Yvette認為Marco及俊駒的角色，是象徵麵包與愛情，至於最後她會如何選擇，她就賣關子。問到現實中她又會選擇愛情還是麵包？Yvette說：「暫時未遇過呢種情況，現實中嘅愛情比較複雜，冇得只係揀愛情定只係揀麵包，所以都好睇對象畀我嘅感覺，暫時都係揀唔到，話唔定見到個好靚仔嘅會『沉船』都唔定。」談到感情狀況，Yvette笑言過去幾年受疫情影響社交，目前仍是單身，都是會以工作為先。
人紅自然是非多，近日她就被翻舊賬，指她的樣子愈來愈精緻，尤其鼻樑及下巴，被質疑整容，對此她承認有接觸醫生：「醫美喺呢一個時代，稍為貪靚及會保養自己嘅女仔，係好平常嘅事。」她又否認有整容，下巴變尖全因一個意外：「入行之前兩三年我仆倒縫咗幾十針，而下巴個位變尖係因為裏面啲肉增生咗，之前選港姐包包臉時係唔覺，但前幾個月中咗新冠肺炎，個人瘦咗好多，塊臉都凹咗好多，臉型變得好奇怪，我現在都有做雷射去疤 ，可能刺激到又腫返，有時唔穩定就會咁樣，其他部位我話冇動到就冇動到。」
