鄭秀文以有型性感造型 為7月紅館騷拍攝海報
香港文匯報訊（記者 梁靜儀）鄭秀文（Sammi）昨日宣布將於7月假紅磡體育館舉行《You & Mi 鄭秀文世界巡迴演唱會香港站 2023》8場個唱，Sammi相隔3年再開個唱，今次亦是她第11次在紅館開個唱。早前Sammi演唱會海報曝光，身穿有型性感服飾，大晒弗爆身材，狀態大勇，連她本人都表示好滿意。
對於今次演唱會海報拍攝，Sammi非常期待，心情又興奮又緊張：「好希望拍到一輯好理想嘅海報，無論概念、造型、服飾、攝影，甚至耳環都好講究，帶出不一樣感覺畀觀眾。」她還透露事前認真做了一些功課：「我喺拍攝前做好皮膚護理、瞓好啲等基本準備，今日影海報呢條裙確實有少少難着，因為剪裁特別又好多元素，有舞台感、高貴感，仲有啲Punk，一套衫有咁多元素，好特別，所以我都要做好身形管理。結果無問題，已經過咗一關啦，我好滿意！」
飲食不再過於節制
身材一向弗爆的Sammi，承認以前飲食比較節制，現在心態較隨意，不變的是堅持勤做運動。她說：「我試過168（ 每天8小時進食），甚至204（ 每天4小時進食），但有時好想食都會照食！現在我好隨心，無限定一個食嘢方式。如果需要着套衫修身啲，就飲食檢點啲，如果套衫輕鬆啲，我有時會一日食三四餐，最緊要做運動，食多啲都唔怕！」她笑言完成海報拍攝，終於可以開懷放縱一下。
對於7月紅館演唱會，Sammi十分重視每項細節，除了唱歌部分，如何呈現不一樣的演繹方式都好重要，她估計來睇演唱會的歌迷，心目中對這方面都有要求，希望睇到更多元素。而服裝造型方面，她一向都好鍾意着靚衫，好鍾意Fashion，所以這方面一定不會缺少。至於歌曲和音樂部分，Sammi亦想做多些不同元素：「我同音樂監製梁基爵多年來夾得好好，我哋都想做到多嘢聽和睇，我好鍾意一個演唱會內有不同元素，亦都係我自己做演唱會嘅方向。」
