【粵語講呢啲】生活上的「正體字」和「異體字」（2）：有鈎陳 Vs 無鈎陳
梁振輝 香港資深出版人
就圖片中嘅補習姐姐同陳仔嘅一段對白內容，你可能曾經有過類似嘅遭遇，而呢個遭遇亦帶出咗一個令人非常苦惱嘅問題：
乜呢個字唔係咁寫嘅咩？
亦即係話，你寫緊嗰個唔係官方公布嘅「正體字」（標準字、印刷字）而係「異體字」。
「陳」有陳舊嘅意思，超市有得賣嘅老「陳醋」個「陳」字一般都係有「鈎」嘅。
講到食燒鵝，香港人會推薦你去深井「裕記」或者「陳記」呢兩間馳名中外嘅燒鵝專門店。「陳記」個「陳」字有「鈎」係意料中事喇！睇真啲，隻鵝隔籬個「陳」字係冇「鈎」㗎喎，搞咩呀？
一講到姓「陳」，近代會諗起中國新文化運動其中一個始創人「陳獨秀」。喺佢嗰本晚年著作選，題字就用咗有「鈎」嗰個「陳」；由佢主撰嘅《新青年》，「陳」嘅印刷字都用咗有「鈎」嗰款。
咁嘅環境，你估「陳氏宗親總會」畀唔畀到啲堅料吖嗱？第23屆聯席會議嗰陣，「陳氏宗親總會」個「陳」用咗有「鈎」嗰款；但係第24屆聯席會議嗰陣，「陳氏宗親總會」個「陳」就用咗冇「鈎」嗰款。連呢班「老陳」都畀唔到個定案，咁邊個至畀到呀？
要嚟真，梗係由「字源」度入手喇！「陳」字最早出現響商朝嘅「金文」，距離而家將近四千年；跟住就到楚系「簡帛文字」，然後就到《說文解字》嘅「小篆」。睇呢幾款字形，好似唔多覺「陳」字個「鈎」點走出嚟咁喎？
「陳」係中國人，尤其廣東人嘅大姓；「陳」字如果冇隻「鈎」，邊得嚟咁有氣勢呀？王羲之嘅「永字八法」之所以震驚古今書法界，或多或少同「永」字嗰隻「鈎」有關。可能係咁，王羲之寫《百家姓》個「陳」嗰陣都用咗有「鈎」嗰款，於是乎就搞到你跟、我跟、個個跟！
各位，只要你隨便搵個人，無論佢係咪姓「陳」，叫佢寫個「陳」字，筆者好相信應該冇乜邊個唔寫個「有鈎陳」！「字源」呢家嘢係畀文字研究嘅人玩嘅；對於普通人，慣性、偏好性先係至重要。雖然官方用咗「冇鈎陳」嚟做咗「標準字/正體字」，即係擺明唔跟主流意願，但係冇話過唔畀用「有鈎陳」喎，所以各位「老陳」或者「有鈎陳」嘅擁護者，你哋條氣唔使唔順，繼續用你哋嘅「有鈎陳」，唔使理人點講嘅！
由於大部分手機或者電腦所安裝嘅字體，只係包括嗰啲所謂「標準字/正體字」，所以當你用輸入法嗰陣，「有鈎陳」唔係認唔出，就係認咗做「冇鈎陳」，所以如果唔係手寫，想「有鈎陳」出現都有一定嘅難度㗎！時間耐咗，「有鈎陳」就響年輕一代嘅認知裏頭靜雞雞咁消失咗！
最後提提大家，按照官方揀「冇鈎陳」做「正體字」嘅法則，「東」、「凍」、「棟」呢幾個字如果寫有「鈎」就係寫咗「異體字」。
