《無間道》上映4K復修版 劉偉強：感覺似嫁女
香港文匯報訊（記者 梁靜儀）劉偉強和麥兆輝執導的經典電影《無間道》將於12月12日重新在港上映，不經不覺首度上映已是20年前。今次寰亞電影使用先進的4K數碼復修和杜比全景聲（Dolby Atoms）環迴技術，把原版電影拷貝的聲畫質素大幅躍升，並定於首部曲開畫的同一天，即下周一（12月12日），重新安排公映《無間道》、《無間道II》及《無間道III終極無間》。影片日前上映優先場，劉偉強導演驚喜現身，與首批在戲院欣賞完成品的觀眾見面，現場除了《無間道》的忠粉，亦有不少音響發燒友，劉導演形容心情似「嫁女」。
解釋揀選《被遺忘的時光》
劉導演說：「20年前拍攝《無間道》好似生仔，今次就好似嫁女，好開心，20年後重新修復和重新上映，真係好開心。（邊一個場景特別期待修復後在戲院睇？）無喎，因為每一個場景都好特別。」劉導演更即場畀「貼士」觀眾，未開場就已經是精彩位，他說：「當年我哋拍《無間道》好清晰要帶觀眾投入，所以一開場credit位已經做得好好。然後喺個廟『噹』嗰一聲都好睇，有啲人鍾意兩個主角喺天台、黃秋生跌落嚟，其實就連鄭秀文嗰場問『到底你係邊個』，呢啲文戲都好睇。」
有觀眾問點解當年揀蔡琴的歌《被遺忘的時光》呢？劉導演說：「好多年前我哋玩音響嘅人，都會攞呢隻碟嚟試機，當然首先因為蔡琴嘅歌聲好靚，而且佢呢張碟嘅質素好高。當我知道要拍一場劉德華同梁朝偉，喺HiFi舖相遇嘅場景，我專登去搵一首歌放喺呢場戲，其實連歌詞都好配合到佢兩個人戲裏面嘅身份。當時好多人都唔知道，呢首歌將會爆紅，影響咁深遠。」
