再選美表演腹語 陳懿德通頂狂練
香港文匯報訊（記者 梁靜儀）無綫真人騷綜藝節目《傳承·狂歡 55：香港小姐再競選》，14位佳麗可謂臥虎藏龍，當中《東張西望》主持、3號陳懿德及11號何沛珈的表演更相當耀眼。
於中文大學新聞及傳理系畢業的陳懿德（Rachel），曾入圍2021年港姐八強，代表作是短短3個月內激減22磅後踏上競選舞台；經過一年，Rachel愈減愈勇瘦多1.5公斤，腰圍由25吋減至23.5吋，上圍上升了0.5吋。談到減肥心得，Rachel坦言最瘋狂時完全唔掂油鹽糖，3個月只吃白烚蛋白質，再加每朝空腹跳繩400下。
在才藝表演環節，本身有聲樂八級實力的Rachel表演腹語，除了與拍檔「癲癲」對答搞笑，還輪流獻唱。為了是次表演首度接觸腹語，Rachel事後透露：「我只係學咗兩堂就要上台，主要靠私下不斷練習，就算凌晨兩三點收工返到屋企都繼續練，因為我對自己要求好高，唔可以淨係做到，要做好！」她又坦言學腹語難關多多：「首先搵老師已經好難，然後係keep住個口唔郁，最難係唔只把聲，連個腦都要切換得好快，否則手口唔協調就會穿崩，我諗今次之後，我可以試吓拍人格分裂嘅戲。最搞笑係我返到後台有人問我『你錄定音定配音㗎？』咁因為我係Live㗎嘛，佢咁講就令我好放心自己無漏口。」
何沛珈化身「孔雀」
2020年五強佳麗何沛珈（Roxanne）則表演混合美態及力量的傣族舞，化身「孔雀」的她，先後做出單腳站立等高難度動作，對她來說是一大挑戰。自小已是舞林高手的她，為了是次比賽首度接觸傣族舞，專誠找來演藝學院老師幫忙排舞及訓練，花了一個月時間學習，由於她的肌肉量不夠，所以減重同時又要做重訓。Roxanne形容練習傣族舞感覺猶如生仔一樣痛：「呢隻舞要求嘅柔軟度比我平時再勁多一倍，特別係要開肩開胯下腰，老師仲會踩住我幫我落得低啲，感覺同生仔一樣咁痛。」
