為保形象堅拒接演變態角色 方力申再遇「阿寶」 緊張頻NG
香港文匯報訊（記者 梁靜儀）方力申（小方）入行以來甚少演出劇集，近日罕有地接拍由葉念琛監製、編劇及執導的無綫台慶劇《美麗戰場》，劇中飾演香港首富的兒子，而與「阿寶」結下不解緣的小方，電影中他曾遇過鄧麗欣（Stephy）、佘詩曼、王菀之及蘇麗珊四位阿寶，跳入公仔箱亦遇上「阿寶」（陳瀅飾鍾家寶）。再度遇上「阿寶」，小方形容「阿寶」令到他心情好興奮、期待又緊張，更頻頻NG。
入行多年才拍人生第3套劇集的小方，之前曾多次參與葉念琛的電影演出並多次擔任男主角，而今次為二人首次合作電視劇集。問到葉導是如何打動他接拍？小方稱不用打動：「同葉念琛係多年戰友，只要對方每一次搵我，都會不計酬勞演出，今次都不例外。」小方又稱事前也不知道自己的角色，但相信導演找他，個角色都不會衰，他很會為演員着想；加上對方又是創作出身，會從觀眾角度去睇，知道演員如何配搭才會好睇及有新鮮感。
今次小方亦有別過往的角色框框，所演的富二代角色性格是外表自信內裏自卑：「因為戲裏我係有錢但冇料嘅敗家仔，喺屋企又係老竇『頂心杉』，兩父子關係又唔好，但又要使老竇錢，因而產生好多衝突，而外面的人都知我係二世祖，所以形成自己自卑。」小方笑言角色跟現實中的他完全沒一樣相似，本身既不自大又不自卑，亦不是「二世祖」。出身小康之家的小方，被問到如何揣摩富二代的角色時，他直言都是靠人生經驗及睇電影作參考：「身邊雖然有唔少有錢朋友，但就唔似我個角色性格，我都有參考電影《GUCCI》，睇有錢人行出來嘅氣勢，而我個角色因有過風光、落泊、甜蜜同抉擇嘅時候，情緒上係有啲複雜，但我很享受做敗家仔。」
有錢人很多時都與女明星扯上關係，劇中小方因擔任港姐選舉的評判而對鍾家寶（陳瀅飾）一見鍾情，二人之前曾傳過緋聞，小方直言跟陳瀅合作，心情好興奮、期待又緊張，他說：「興奮因為我哋認識咗好耐，對方又發展得好，當然期待一齊開工，但一齊工作又係唔係另一回事呢？而另一樣緊張就係自己過去三年做戲機會唔多，主要係做綜藝節目同教游水，做戲我係唔fit囉！陳瀅呢幾年就戲接戲。」小方又自言以前拍電影極少NG，但今次因為演技生疏及心情緊張，拍攝頭幾場戲時會較多NG，又笑言幸好陳瀅沒有給他面色睇。
無意「復出」歌壇
講到陳瀅的「阿寶」跟其他「阿寶」不同之處，他指：「最大分別係我同陳瀅本身係朋友，就算當年同Stephy合作，初時都係唔熟，現在人亦成熟咗，工作上會識溝通多啲，（有冇勾起同Stephy合作的往事？）都冇，『阿寶』都係名一個。」
在劇集預告片中，小方與飾演阿寶閨蜜的朱晨麗有激吻戲成了焦點，小方笑指這已是最激的戲份，沒有更激的。對於激吻戲成了宣傳重點，小方不諱言有問過導演：「導演話今時今日要畀觀眾睇多啲嘢，一開始都唔吸引，人哋唔會慢慢追睇。」對於跟事前並不認識的朱晨麗拍咀戲，拍過無數咀戲的小方笑言沒有難度，認為跟拍動作戲沒分別。
《美麗戰場》 作為台慶劇「頭炮」，小方直言對於收視不感壓力，但透露若收視好會有機會開拍續集。他亦有興趣再拍劇，但苦無機會，只好等運到。小方希望在演戲方面能多作不同嘗試，但某些角色他就一定不會接拍，他說：「我教咁多小朋友游水，某程度上都有包袱，都要保持形象，好似變態強姦同變態殺手。梗係唔揀強姦啦，有啲角色一定要小心選擇，如果我做虐兒同戀童癖嘅變態佬角色，家長仲敢唔敢交個仔女跟我游水呀？」
近年不少上世紀八九十年代的歌手紛紛開騷，當年唱《好心好報》、《好心分手》唱到街知巷聞的小方，又可會「復出」歌壇？他說：「唔會，（封咪？）唔係，未係一個好時候唱歌，要等好時候，（何謂好時候？）到時就會Feel到。」
稱目前不需要拍拖
工作上屬自由身的小方，感情方面同樣屬自由身，單身多年的他形容目前的感情狀況同樣是「等運到中」，問到是否未放低之前一段感情？他帶笑否認：「梗係唔係，緣分未到啫，想試吓一見鍾情，因之前未試過。」之前他曾自爆有玩交友App，自從他公開認識賬戶是真實後，多了人問津：「年紀由廿幾到四十都有，不過我膽細，冇『入樽』，一個都冇約過出來。佢有like我，但我冇like佢。就好似window shopping，好鍾意個手袋，但就係唔買，因為玩唔起，都唔清楚對方底細。」身為長子又屆適婚年齡多時，小方指媽媽當然想抱孫，奈何他真的不需要拍拖：「我生活得好充實又充滿愛，好多人成日想拍拖係因為欠缺愛，想有人錫，但拍拖都可以有好多煩惱、唔開心，如果我好需要就拍緊啦，只不過大家覺得我好需要。」
