周嘉洛上位不求一步登天 陳瀅妒忌好友備受力捧
香港文匯報訊（記者 梁靜儀）無綫當紮小生周嘉洛，入行7年首次做男一，在古裝喜劇《痞子殿下》中飾演的紀威（阿四），浮誇而充滿喜感的演出獲觀眾受落，考牌之作可算順利過關。而一改戲路走搞笑路線的陳瀅，初次夥拍周嘉洛即擦出不少火花，她坦言當初得悉要同嘉洛演一對的反應是「驚驚」，又指妒忌對方獲力捧。
嘉洛與陳瀅初次合作，不單戲裏合拍，戲外亦擦出火花，二人更因合作而傳出緋聞，但當日陳瀅卻一度因嘉洛取代王祖藍而想辭演？陳瀅解釋只是說笑：「講得誇張啲至有娛樂性，我哋咁friend而攞返出來講，的而且確開頭大家聽到係祖藍(演出)，而我最初亦唔係演蠻儀，當經理人同我講要同周嘉洛演一對，我即時就話『吓，?仔？佢得唔得㗎？』」
陳瀅承認合作前並沒有睇過嘉洛的演出，對他完全是零認識：「我之所以會驚驚，因為我之前演戲拍檔係黃宗澤、馬德鐘、蕭正楠，都係成熟穩重型，而喺我世界，演一對通常個男仔要好Man照顧個女仔，有一段好浪漫愛情故事，後來我知道故事係要女尊男卑，咁就覺得好玩喇，可以盡情糟質佢，我講唔到邊個比嘉洛更適合演咁廢嘅角色。」
對於「執二攤」，嘉洛反而覺得有壓力，因有好多第一次，擔心自己演得不夠好。他又多謝陳瀅：「佢會同我傾點演得更好，會互補不足，作為朋友，阿瀅叫我要享受過程，第一套一定有瑕疵，如果識得享受會信心大啲。個經歷係會難忘，呢番說話係幾大影響。」身旁的陳瀅就甜笑說：「You're welcome.」
憑處境劇《愛·回家之開心速遞》金城安角色上位的嘉洛，承認《痞》劇中的阿四帶有安仔的影子，他說：「好唔好睇全部都係好主觀，絕對可以你一言我一語有自己睇法，有時係顧及唔到所有觀眾。」雖然近年備受公司力捧，但嘉洛自知仍有很多不足之處，不會想一步登天，他說：「我完全唔覺自己做得好，但我會學識去接受及改善自己，呢個係唯一方法，亦係我經歷嘅一個階段，觀眾好不幸地睇到我呢個階段，哈哈。」對於嘉洛在劇中的演出，陳瀅亦讚好，笑言要多謝經理人當日力薦嘉洛。
嘉洛太忙成「慣性飛機王」
嘉洛今次可謂瞓身有露股演出，他直言感後悔：「因為係監製突如其來叫露股，所以冇特別操練，早知我會操爆去，露屁股呢個係我暫時底線，我唔排除將來有一日可以再大膽啲。」問到陳瀅可接受突如其來的性感演出？她說：「電視上女仔太暴露好似唔係咁好，有小朋友睇，電影會接受啲。」
入行7年便做男一，問到嘉洛可有被同行妒忌？身旁的陳瀅即搶着說：「我妒忌㗎。」嘉洛表示感恩身邊朋友沒有給他這種感覺。陳瀅就說：「有都唔喺你面前講啦。」嘉洛認為旁人的睇法都不重要：「最重要係做好自己同過得到自己，因為結果好快會出嚟，冇得扮，值得擁有呢啲機會至可以繼續，待人接物亦要小心。」陳瀅就力證嘉洛仍未變質，是發自內心去關心別人。
問一劇接一劇的嘉洛又如何減壓？嘉洛認為最重要是有熱誠：「以前年輕覺得做戲好玩，從來不用放假，到拍多咗劇，發現休息同平衡生活好重要，否則只係帶個軀殼演戲，為做而做，我唔希望自己嘅作品係咁。」忙到沒時間睡覺的嘉洛，一開工便斷六親，他自認是「慣性飛機王」，認識耐了的朋友就會少約見面，所以今次拍完劇一年，能與阿瀅、JW 及朱敏瀚還保持聯絡都算是奇跡。
周嘉洛服裝提供:
Harvey Nichols Hong Kong
攝影：香港文匯報
記者 彭子文
