與陳家樂每日視像見面 連詩雅婚後不急生BB
香港文匯報訊（記者 梁靜儀）連詩雅（Shiga）、艾妮、洪助昇及雲浩影昨日到新蒲崗出席商場活動，雲浩影先送上花球給準人妻Shiga，祝福她與未婚夫陳家樂幸福快樂，之後大會再推出蛋糕為Shiga及雲浩影補祝生日，現場fans更大唱生日歌助興。
Shiga表示平日經常會帶愛犬到商場吃東西及買餸，疫情期間她都多了在家中煮飯，既可省錢又吃得健康。日前Shiga受訪時被誤會與未婚夫陳家樂同居，她澄清沒有同居：「我同男友各有各忙，對方拍通宵戲，收工時我就要工作，連傾電話的時間都沒有，但最近家樂不在港，都會上男友屋企幫手照顧隻狗，而且媽咪得我一個女，都唔鍾意我婚前同居，好多人都唔信我咁多年來都冇同居，不過媽咪好開明，准我同家樂去對方屋企同一齊旅行。」Shiga表示本身都有養狗，是隻15歲的狗女，為怕搞出「狗命」，加上愛犬平日多由媽咪照顧，故將來結婚應該都會留在娘家陪媽咪。
問到可希望生BB做媽媽？她說：「唔會咁快，因為婚期都未定，同埋要處理婚禮要好多精力，我見朋友處理婚禮仲會有摩擦，佢?家唔喺香港，所以都未傾到，未知會唔會有摩擦，但我哋會搵到一個健康方法，冷靜處理問題，同埋我又唔鍾意爭拗。」
說到家樂返內地開工3個月，Shiga指二人已不是第一次分開如此長時間，大家每日都會視像見面，她笑說：「我哋會約好開視像電話一齊食飯、睇戲。」
提到她的師妹邢慧敏成為候選港姐大熱佳麗，她說：「戥佢好開心，雖然同佢唔算好熟，但有合作過，覺得佢係一個好有愛心嘅女仔，希望佢好好享受個舞台，要有自信，笑多啲，唔好太緊張，散發自己最靚一面。」
艾妮 洪助昇現場唱新歌
艾妮與師弟洪助昇各自現場演繹新歌，艾妮坦言入行不久就遇上疫情，已久未出席商場活動，基本上近兩三年都很少見到現場觀眾，所以能夠現場唱新歌《習慣被愛》感到十分開心。洪助昇就表示還是首次在公開活動中唱自己新歌，早一晚更因此而緊張至失眠，早上又失魂以為自己漏戴耳機，他謂要多謝師姐出騷前和他傾偈減壓。艾妮就大讚他的演出，並給他100分。
洪助昇又透露因當晚會跟張敬軒在《Chill Club》中合唱，令他很緊張，艾妮即大表羨慕，她說：「張生（張敬軒）之前嘅演唱會，我幾乎每晚都去睇， 我淨係喺公司內部活動有同佢合唱過。」
日前生日的雲浩影，透露生日只簡單與家人及男友食飯慶祝，問到男友可有給她送上驚喜？她笑說：「我哋唔需要驚喜，怕買到對方唔鍾意嘅禮物，對方仲驚多過喜，講明想要咩禮物仲好，不過我未諗到買咩，我都冇乜物質慾望，最想去旅行，去邊度都可以。」
