讚楊丞琳唱《越難越愛》好聽 吳若希渴望內地登台
香港文匯報訊（記者 梁靜儀）吳若希（Jinny）昨日到九龍灣展貿為港台活動《地區康健中心 - 基層醫療健康新里程》擔任表演嘉賓，身為兩孩之母的她又分享親子健康教育的心得。
近日楊丞琳在TVB及芒果TV聯合製作歌唱節目《聲生不息》中，挑戰Jinny的成名作《越難越愛》，事後被網民批咬字不太準確，但亦有不少網民覺得唱得不錯。Jinny就力撐楊丞琳唱得幾好：「佢唱得幾好，啲聲好實淨，如果用國語人來評價，佢咬字好好，因為廣東話一向難，所以佢係好勁，加上歌詞又密密麻麻，我自己唱都覺得繑口，所以佢好犀利。」她又多謝楊丞琳翻唱她的歌曲，令到歌曲點擊率突然增加。提到她在社交網上載與楊丞琳隔空合唱的影片，她笑指因不能與真人對唱，而這是公司同事的意思，都希望有機會合唱：「楊丞琳『可愛教主』年代啲歌都係我好鍾意聽，唱K必唱。」
Jinny將赴內地拍網劇，問到會否想順道登台？她說：「當然想返去登台，可搵多筆錢，內地市場當然大好多。」不過問到可想順道參加《聲生不息》？Jinny卻說不想：「因為太攰，最近要拍節目同宣傳新歌，忙到冇時間瞓，呢啲太攰的工作擔當不起。」問到子女可會不捨得她離家那麼久？她說：「我唔知，從來未試過離開仔女咁耐，個女仲安慰我話50幾日好快啫，老公就應該冇唔捨得，昨（前）晚已經約朋友上屋企打機，又笑得好開心，仲嘈住我瞓覺，好嬲，佢應該好期待。」
