【本報消息】浪漫勇士平步青雲
今年冠軍一哩賽同女皇盃雖然疫情影響未有外隊馬嚟跑，但係馬場開放返俾馬主入場，有返啲賽事氣氛，最開心應該係睇到有明星馬順利接班，今屆打吡冠、亞軍「浪漫勇士」（圖8號）同「加州星球」分別喺一級賽贏馬同上名，可以預期呢對馬係下季香港馬揚威大賽嘅希望。「浪漫勇士」同「加州星球」搏完三場四歲馬系列賽，再撼本地最頂級嘅精英，依然有好表現，證明呢兩隻馬質素唔係講玩。「加州星球」只係輸俾馬王「金鎗六十」，係非戰之罪。「浪漫勇士」成為第五隻贏完打吡即刻贏女皇盃嘅馬，以往做到嘅四隻馬分別係「爪皇凌雨」、「雄心威龍」、「威爾頓」同「明月千里」，全部都做過香港馬王，話唔定「浪漫勇士」就係未來嘅馬王。
「浪漫勇士」連贏兩場大賽後，帶出好多話題，除咗談論香港拍賣會終於出返隻好馬，亦有好多人奇怪，初出策「浪漫勇士」連贏四場嘅莫雷拉，點解喺四歲系列賽開始無咗策騎權，唔通莫雷拉連隻質素咁高嘅馬都走漏眼？據知沈集成想早啲落實騎師人選，莫雷拉未覆就索性換人，整定田泰安有運行。馬王「金鎗六十」啱啱刷新最高獎金紀錄，放棄遠征日本跑安田紀念賽亦都係意料之內。派馬遠征從來都高風險，過去唔少本地頂級馬去完返嚟都跑唔返，我哋食花生嘅，講就梗係容易，但呂健威係練馬師，冇人比佢更清楚「金鎗六十」情況，即使佢能力眾所周知，話佢怕輸、冇勇氣並冇意思，再白啲講，除咗馬主，其他人根本冇資格說三道四。
緣厚情摯鎖定寶塚
一連兩屆在春季天皇賞中伏嘅「緣厚情摯」，去年不敵「世界首映」，本以為今屆可以補中，卻又遇上且放且留輕鬆帶到「領銜」，但練馬師大久保龍志已經確定此駒下一仗目標，將會出戰6月26日，於阪神競馬場舉行之寶塚紀念賽。
「緣厚情摯」去年曾遠征法國凱旋門大賽，縱使落敗，但以其長途實力確實屬日本頂尖級分子，不過只是在日本重要一級賽如春季天皇賞、有馬紀念賽等，都曾有上名紀錄，唯獨是卻從未有一級賽之勝利榮耀。
大久保龍志表示，「緣情厚摯」上場春季天皇賞遇上「領銜」，似乎3200米雖可勝任，相信跑番回2000米至2400米途程才是強項，蓄銳再戰寶塚紀念賽，到時與「領銜」碰頭，誓要報卻一箭之仇。
