【文匯精選】玩得好樂仔再發威
韋達現時手上最新武器，並非旗下任何一匹戰馬，而是有位識得贏馬的十磅仔周俊樂，小子初登場騎四駒出賽，結果取得兩冠一季一殿，全部有獎金，最過癮相信是韋達，因為周俊樂拜師門下，徒弟贏馬獎金與師父一人一半，這包括外借的收入，現時韋達除旗下馬匹幫他贏獎金外，連徒弟都變成一隻會生金蛋之母雞，相信韋達見到周俊樂大可當作財神看待。由於周俊樂是初在港上陣的關係，馬會有規矩，冇贏番一定數目頭馬及足夠快活谷試閘次數，暫時都唔會批准佢跑谷草。因此，現時周俊樂要贏頭馬，只有沙田一個場地。講番今戰師父又點運用呢位見習生，一如首次此子登場的安排，全日只派兩駒給他上陣，有二班千八米的「創意天才」，另外仲有匹「玩得好」跑四班千四米。馬房最睇好是「玩得好」，冇傷冇病馬，首季插入四班出賽，第二仗即贏谷草千二米，評分曾經上到三班，亦常在三班跑入位置，但始終難再與頭馬結緣，今季「玩得好」加盟韋達馬房，經已跑了五仗，每次都用不同騎師，分別有沈拿、莫雷拉、田泰安、彭國年及蔡明紹，這五仗的賠率由最熱的四倍半到最冷的十二倍。上述證明了一點，無論練馬師用任何級數的騎師替這駒披甲，必然有捧場客，顯然是相關人事早已對「玩得好」有一定的信心及支持，不過這駒總會有些問題令到鞍上人未能使出最佳威力拚勝，不過在這五仗中，這駒曾在莫雷拉胯下跑千四米走得一席第三名，只是輸給「正本開心」及「電路三號」這兩匹超班馬腳下，前者現居三班，後駒也已上到二班，目前仍沿留在四班作賽的「玩得好」，在操練正常及狀態冇問題下，馬房用上一位騎功不俗兼有十磅可減的周俊樂，無疑是給了這駒最有利的贏馬條件，今賽大可在千四米重振雄風了。
