【騎練軍情】南區寶摩廄添進帳
大摩副練余詠詩，下季依然未有地方落腳，因為大摩今季結束後便散倉，佢只能夠四處搵馬房埋班，據知副練位置應該冇乜機會，但求有馬房收為第二副練。至於今次大摩倉內有兩駒的備戰動態是非常肉緊，分別是「南區寶」（圖前駒）及「活力勇士」，兩駒在排位日齊齊到機坪踱步，前者由華籍助手踱步，後駒則由余詠詩踱，兩駒踱步期間均非常討人喜歡，「活力勇士」口勁收斂，文靜非常，至於「南區寶」則於踱步期間一路打蹄，非常好火氣，兩駒踱步後返馬房，倉主再細心檢查一番，認為一切妥當才安排清潔。看摩廄埋門的備戰所見，這兩駒均有力替馬房增添進帳。
中華威威開齋在望
韋達新簽見習生周俊樂果然犀利，初登場即起個孖寶，騎四隻馬全部有獎金落袋，除贏師父韋達隻「承你所願」外，又替大摩「二郎」落飛得手，仲有「進力之城」得第三名及「百寶袋」跑第四，馬會有條文規定，見習生所有贏馬獎金，與師父天一半地一半，所以韋達簽得周俊樂為旗下見習生，真係有排收錢。當然身為師父，必須負起教導責任，雖然一出技驚四座，但倉主對徒弟的一舉一動是非常嚴謹，好似今次夜賽咁，徒弟目前尚未可以列陣跑馬地賽事，但師父依然捉住佢�魒倥銗|處學�洁A正如周一排位朝，馬房安排三駒在馬房內換出賽銻甲，這三駒分別是「全才」、「天天向上」及「中華威威」，韋達吩咐副練薛順強，一定要睇實釘甲師傅如何換甲，並且在每駒換完甲後都要騎踱一番，以證明釘甲過程是沒有問題出現，而與此同時韋達要周俊樂在場睇釘甲，睇睇各駒在釘甲師傅於不同情況下如何上釘。據知，每隻馬的蹄甲可以落四至五口釘，只是視乎需要，上述三駒釘甲完畢，倉主立刻睇住薛順強為牠們踱步，認為步姿完全無問題才放心。
上述三匹列陣馬，據悉都是馬房今次出擊重心，「中華威威」上場排十一檔在谷草千二米鏟入冷位，經已顯示本身不凡潛力，今次依然交由史卓豐披甲，雖然所排的檔位更比上仗差，在十二檔出閘，但以這匹居於四班微超的馬而言，留住衝一段，依然是有坐位望贏的本錢。
天天向上試準起筷
至於跑四班一千米的「天天向上」，一直以來都是交由薛恩操刀，鞍上人訓練這駒亦是甚有心機，試過在三場谷草千二米陣上採取過居好位進取，也試過留衝一段，表現都是不太理想，最近一仗馬房安排牠跑谷草一千米，排十檔後上衝得一席第三名，只以一位三輸給「南區寶」，這一仗鞍上人也因應檔位較外，故沒有跟隨群駒鬥搶，只是留到最後一條直路追趕。今次馬房再替這駒出戰一千米，排四檔形勢有利可跟得較前位置，所以即使上次「南區寶」曾經贏過牠，但今次在不同形勢下，「天天向上」已有反勝條件。除此之外，「全才」上仗谷草二千二百米由潘頓跑入一席亞軍，狀態已漸入佳境，今次縮程跑谷草千八米一樣適合腳法，用韁繩功夫比較柔的薛恩操刀，可以媲美潘頓，依然值得重視。
