【網議政事】攬炒畫師「阿塗」着草 網民：好走唔送
正所謂「平生不作虧心事，半夜敲門也不驚」，香港國安法一實施，唔少心虛嘅黑暴分子紛紛着草。近年畫下唔少反中亂港、煽暴仇警等漫畫嘅插畫師「阿塗」噚日就喺Facebook發帖話自己已着草離港，又呻話自己「只擔心往後的作品會魂不附體，難接地氣」，又話「諗起要被迫陪我一齊走難的太太……心裏非常愧疚」喎！唔少網民就覺得佢應有此報，仲叫佢千祈咪返香港，「外國丐幫歡迎你！」
聲稱累太太陪「走難」感「愧疚」
「阿塗」噚日喺Fb發帖自爆佢已帶埋太太着草，雖然無話去邊，但就上載咗張以英國倫敦為背景嘅相。「阿塗」喺帖文中死撐，話自己離港「係因為我想繼續為香港創作」，「只擔心往後的作品會魂不附體，難接地氣」，又「懺悔」話「原諒我軟弱無能」，「諗起要被迫陪我一齊走難的太太……心裏非常愧疚」云云。
對「阿塗」稱驚離港後嘅作品「離地」，唔少網民都留言寸佢。「Piyo Piyo Yuen」就話：「黃豆嘅漫畫根本就堅離地，老作唔好扮接地氣！」「Kwok-Keung Ip」就話：「去到外國就好快可以落地獄咪夠哂（晒）貼地氣啦。」
有網民就覺得香港又少一個害群之馬，實在大快人心。「Ann Chan」話：「啲破壞香港嘅人走晒最好！」「Wong Kai-wah」就叫佢「早走早着，千祈咪回來」，「Jeff JY」就用「阿塗」創作的高登神獸卡上嘅廣東話粗口諧音，揶揄返佢本人「金翅（今次）玩×猿（完）。」
就「阿塗」近年對特區政府同香港警察的抹黑，有網民就認為正好讓「阿塗」趁今次見識吓英國是否會好似香港咁容忍。「Peter Shum」話：「試吓醜化女王，睇吓有冇你講自由，分分鐘命都冇……」「Man Lung Hau」就話：「咁就好啦，不用煽動暴力。到支持佢的外國，才發現世界完全不一樣，去到英國畫啲挖苦英國皇室的漫畫，肯定『有運行』！」 ◆香港文匯報記者 黃書蘭
