【鞭影蹄聲】閃電雪前恥
今日沙田十場以六草四泥形式進行，草地採用C+3跑道進行，由於移欄後比賽空間狹窄，彎角急銳，形成貼近內欄跟前競走之馬匹，在這段路程所節省腳程，足以轉化為抗衡後上馬最強大優勢，故此與泥地賽道一樣，對於跑法較為主動之馬，機會可秤先多少。頭場開跑時間為下午一時正，以下是筆者的各場心水提供。◆郭旭
【第一場】第五班、一四○○米（草地）。「紅磚勇士」四班要等形勢，相反落到五班便具備半超級分量，翻查賽績，對上三次五班同程獲一冠兩亞軍，如今完成任務，配合當前狀態仍是火噴噴模樣，係時候重拾勝軌。「龍寶寶」年富力強處當打之年，輾轉落到五班也搖身一變成為上風馬角色，如按照早前兩度於四班同程不敵「啱啱好」跑獲第五名的水準衡量，在此已有討價還價之力。「天地同心」狀態跑起，乘這陣子正值勇境，必然可拚則拚不作保留。拖埋「真感」。
【第二場】第四班、一二○○米（泥地）。「電子兄弟」上次轉跑試閘經常交出有前有後走勢的泥地賽，效果一如估計般好，只受制大把虛分的「龍騰飛翔」入Q，水準殊不弱，摸底後如今強敵遠去，係時候出人頭地。「顏色王子」上次賽日前退出只屬小問題，回看去年九月懸韌帶受傷，豹隱一段時間才重整備戰，進度卻見討好，尤其早前贏泥閘沿途愈放愈有，姿態倒是吸引，初出選擇向泥地賽問津，有力打響頭炮。兼顧「駿天使」及「夢幻人生」。
【第三場】第四班、一四○○米（草地）。「揚帆順風」今年轉由文家良接手，備戰程序一直一絲不苟進行，承接進度持續向上，腳步聲開始愈來愈接近，處身今組非強組別，已可問收成。「皇者驕傲」自購馬多跑下漸入佳境，今戰鎖定千四為目標，估計落點就在今場。「金發銀發」接連三班有接近演出，今仗落班即扳大頭配潘頓，小心一步到位。兼顧「飛天劍」或「場長勝」。
【第四場】第四班、一二○○米（草地）。「年年豐盛」上賽出閘順利、直路唔再受阻展步暢順便手到拿來；開竅後仍安排試閘，戰鬥力持續昇華，有條件再勝。「加州威勝」上賽一改放鳶跑法走入Q腳，效果煥然一新，摸底重來轉到賽道更利前置的C+3欄，有助提升競爭力。「聚風雲」初出重票一擊即中，沿途跑來尚搶口一樣跟得又鬥得，擺明恃質凌人；贏完繼續密密練兵，急躁急口問題有了顯著改善，預期今次競爭力會進一步增強。T腳「勝利之皇」。
【第五場】第四班、一八○○米（草地）。「路路爽」雖仍有多少急口問題待解決，但自購馬來港出賽三次已可迅速潛入四班，處境實在有利非常，均速性能扳上千八也必定有好冇壞，可予秤先。「神龍駒」前仗跑嫌短千四米都追得係威係勢，上次轉跑泥地志不在此，賽後獲減去兩分，今次重返四班即移師上名率不俗的田草千八米，箭頭在此。「健康馬」直落三場上名，汲取一次千八米路程經驗，可期今戰更具侵略性。再揀「機械戰士」或「紅麗舍」。
【第六場】第三班、一六五○米（泥地）。「好好心得」今季被蘇保羅摸到訓練竅門，加上搵啱泥地出路，兩勝同程締速與姿態一次勁過一次，表現進步不斷；上次轉跑千八米跟了一個快步速，埋門維持勁勢唔斷尾，表現一樣可圈可點，今仗縮程折返一哩更添威力。「天天精彩」近期弗得交關，上次更刷新全港紀錄時間贏千八米，五捷泥地專家重返另一射程一哩，爭勝條件樂觀。拖埋「一定美麗」及「源源動力」。
【第七場】第三班、一○○○米（草地）。「神速奔馳」初出直路賽漏閘尚可後追入Q，早知實力唔簡單！之後兩戰改善弊病，贏完四班再征服三班，完全視對手如無物，短線進步幅度驚人，三歲雄馬體格魁梧加磅問題影響不大，篤定贏多次。「宜春輝煌」今季轉由韋達接手部署不急進，利用一段時間調節評分，上賽終於恢復上名，大致完成程序，只是不幸再遇到上次贏牠的「神速奔馳」註定難有運行，入Q當贏。拖埋「日日型」與「齊心同行」。
【第八場】第四班、一六五○米（泥地）。「妙算歡騰」近兩仗轉攻泥地猶如脫胎換骨，前仗一哩沿途開了一個超快步速，埋門尚可抗衡「印水紙」衝刺獲勝，姿態犀利；接戰增程千八一樣贏來有頭又有尾，更要加添不少難度分，自購馬搵啱出路開竅後，隨時贏到你唔信。「日就月將」連續兩場入Q，傷癒後配合目前評分有利，全面重拾戰鬥力，搏開未贏必再接再厲。配腳「華卓晴」和「觔斗雲」。
【第九場】第三班、一二○○米（泥地）。「閃電」（圖9號）前仗初跑泥地取勝姿態如君臨天下，上賽力拚鬥輸入Q則輸多少纏鬥經驗；復課勇熟程度有增冇減，沿留三班穩可執多W。「時時滿意」北半球馬能適應得如此快，必有過人之處，觀乎晨課泥地試跑走勢爽勁，轉打泥戰合跑成數高達九成九，有力再下一城。「文明之星」歷來三捷全部出自三班泥地同程，重降此班繼續瞄準一組特別上限三班賽無須負重磅，機會不甘後人。兼顧「龍騰飛翔」。
【第十場】第三班、一四○○米（草地）。「美好世界」心律不正後復出跑三場不勝有位，迅速走出健康陰霾；上賽負頂磅讓「金發盛世」十四磅鬥輸非戰之罪；進度納回正軌開竅後，沿留三班可再贏。「極速飛彈」直落兩場不勝有Q，縮回千四米效果零舍不同，有條件勝完再勝。「合夥雄心」轉投東廄後直落四場不勝有位，打破過去例冇打疊好異數，摸底後乘這陣子銳氣正盛，以馬房作風定必盡用一時。「紅旺」連續兩場千四及一哩入Q段速繞富水準，勇況返晒來，當難掉以輕心。
