【圈中人語】上駿之星殺氣騰騰
今晚沙田舉行全泥夜賽，頭場下午七時十五分開跑，三T有一百九十四萬元多寶，第一口孖T有八十四萬元多寶，四重彩及四連環多寶則於第二、四、六及八場各有八十萬元。練馬師方面，沈集成、蘇保羅、鄭俊偉及希斯均派出多匹實力馬參戰，要優先留意。騎師方面，潘頓、雷神及田泰安都手執不少惡馬，可作為扶手棍看待。
第一場、第四班、一八○○米。「團結一致」跑泥地一哩擁有五成以上嘅入圍率，去季夥拍薛恩打開勝門的一仗，蹄下敗將是實力指標「兩全其美」；今季霍利時散倉後轉投蘇偉賢麾下，上仗轉倉初出跑泥地一哩，輕描淡寫追回第三，今賽轉戰千八，可博半冷。
第二場、第五班、一六五○米。「波哥哥」季內六戰之中，最近三仗表現已穩定下來，尤其大前仗跑谷草千八，不幸地跟隨墮退的「成功星駒」，延誤了發力，最終仍追入季軍；前次一哩亦把握錯了發力時機，被逼於外疊入彎下，最後一百無心戀戰敗近；上次回師千八抽得一檔，馬雅卻由內疊到入彎掟出外疊蝕追，當然交不出追勢；今次練者揀泥地一哩捲土重來，有分頭值得捧場。
第三場、第四班、一二○○米。「添有運」上季來港的澳洲自購新馬，但由於成熟程度未足，在港至今頭八場均未能跑入三甲，但間中也有一些走勢，譬如前仗出爭谷草千二，首度降五班兼由莫雷拉策騎，可惜全程跑來欠順，直路雷神亦沒有太過用力催策，最終負於頭馬「友誼至佳」四乘多；上仗增程千四配田泰安，一放到底下帶到開糊；今仗升四班縮爭泥地千二負輕磅有利，應可延續好表現。
第四場、第五班、一二○○米。「金剛石」上賽之前服役第四季一直贏唔到，真係叻極有個譜，但今季轉六歲後表現穩定，之前兩戰田草千二都跑入三甲，試過跟前及放頭皆未竟全功，尤其前仗當日賽事大利放頭，但此駒卻錯失贏馬良機，最終只得第二，幸好上仗轉跑泥地千二，蔡明紹把握機會半冷門打開勝門，如今續爭贏馬途程，排二檔好位有權放頭搏走甩，值得再追一趟！
第五場、第一班、一二○○米。「上駿之星」季內跑過四次，前仗易配田泰安角逐泥地千二叩響今季勝門，剛役移師窄場千二，亦以輕鬆姿態打疊再贏，力拒「暖在你心」及「韋小寶」來犯；今次回師泥地千二只孭輕磅，排有利三檔只要快閘楔得好位，有望締造三連霸佳績。
第六場、第四班、一二○○米。「火鑽」四歲當打分子，雖然跑過五場仍未贏馬，但三戰泥地千二兩度入Q；上次回師泥地千二，扳到莫雷拉搏殺心諗可以熱食，點知十九蚊全熱門跟跑前冇後勁只跑第五；拚後馬房備戰工夫升級，埋門由副練一手打磨收身上力，今鋪再戰勢必全力補飛。
第七場、第三班、一八○○米。「皇帝金」上季搏極都係第四至第六名，直至今季初降到四班，終於就喺草地千四打開勝門，用到潘頓壓陣都只係影相險勝，之後上三班連番拚搏皆未能再贏，不過希斯輾轉又替牠試到泥地呢條新出路，最近三戰泥地全取獎金，上次轉戰谷草千八，在賀銘年胯下蝕追爆出冷W，今次報回泥地千八，一月初爭此程曾跑第二，隨時再有驚喜。
第八場、第三班、一二○○米。「閃電」沈集成G布馬，今季派上戰線，初出前經已在泥閘顯露悅目走勢，頭兩場列陣田草千二，臨場皆票如雨下，最終卻只走得第四及第五名，表現令人失望；上賽打王牌轉戰泥地千二便一擊即中，後追贏對手個多馬位，以馬兒質素之高，現評七十二分仍有着數，今次賽前再彈泥地大閘走勢依然吸引，打鐵趁熱添食冇難度。
