曾志偉出山主持全新節目 《講你都唔信》
暫緩電視城閉環管理 惟藝員入廠前須做檢測
香港文匯報訊（記者 梁靜儀）無綫總經理（節目內容營運）曾志偉與錢嘉樂主持的全新綜藝節目《講你都唔信》，將於明日起，逢星期一至三晚播映，昨日二人聯同丁子朗、林秀怡與黃婧靈（波波）等出席於將軍澳電視城舉行的拜神儀式。無綫電視城早前原意本月20日後開始進行「半閉環式」管理方案，志偉昨受訪時表示如果政府不禁足，他們都沒需要閉環。現時雖然暫不用實行閉環式管理，但無綫要求藝員入錄影廠前做檢測，確保每位入廠的藝員都是「一線」。
志偉表示節目構思是因為之前政府有全民檢測計劃：「萬一要禁足、閉環，我哋都要作出準備，提供資訊娛樂畀觀眾，所以諮詢過藝員及工作人員，邊啲願意閉環式留守，結果好多人報名，今次呢個節目就當係預演，亦都畀市民習慣吓，自己當然要身先士卒留低陪大家一齊主持節目，所以就有呢個構思，即刻打畀大師兄（錢嘉樂），我同嘉樂係鐵腳之外，每晚都會有唔同主持，暫定拍3星期，（之前流傳話有8個環節？）其實唔只8個，但如果政府唔禁足，我哋都冇需要閉環。」
沒收視壓力盼帶歡樂給觀眾
他又笑言重出幕前都擔心觀眾是否認得自己，問到他出山做節目是否要救收視？志偉笑言無須要救：「冇嘢要救呀，我救返自己咋，我都有少少蠢蠢欲動想出嚟做，因太耐冇做，自己都有興趣做返獎門人節目，但唔想被人話我又用獎門人去打人，所以一直冇做，因為今年係無綫55周年，又係獎門人25周年，港姐又40周年，可能下半年有好多大型節目，獎門人都會出嚟玩吓啦，（有冇收視壓力？）冇，現在個個留喺屋企，其實啲節目收視好好，我驚我出嚟做節目個收視唔好，其實最緊要同觀眾渡過疫情難關，希望呢個時間每晚畀歡樂大家，陪大家傾偈，呢個先係做呢個節目的初心。」
志偉又透露原本閉環，節目就會做直播，但現在不用閉環就改為錄播，今日錄影翌日播，可貼近時事。問到是否要出動人情牌邀請嘉賓？他笑說：「唔使人情，佢哋個個都出糧，好感動好多人自動報名，有六七十人。（你會唔會率先體驗閉環？）我同閉環冇分別，晚晚天光至走，如果閉環好多嘢要解決，都有諗過閉環就喺露天停車場搭帳篷畀大家瞓。」
承認無綫有近500員工確診
說到現時暫不用實行「閉環」 ，劇組是否可以如期復工？志偉坦言劇組仍未能開工：「因為好多同事家人中咗就返唔到來開工，只要劇組有1個中就開唔到，外景都開唔到，最多都係拍廠景，好彩劇集多存貨。（有指有500位同事曾確診？）呢個數字非常符合政府預測，公司有3,000幾人，500人確診，即係政府預計7人有1人中，但大部分同事都唔係喺公司感染，係喺屋企，到全部冇事又要等政府檢測報告為準都成個月，昨日開會有三分之二的同事係康復返嚟。」
問到節目錄影時會否有措拖保障大家？嘉樂指每日入錄影廠前都要即場做檢測，笑言自己是「一線演員」。志偉就指節目最多維持10至12位幕前。問到是否就是如早前流傳的「閉環天團」12人？志偉說：「有諗過12人閉環，但太多人報名，現在又唔需要閉環，（除了嘉樂，可有欽點對象？）今次以司儀為主，因為我想同大家分享我咁多年做司儀嘅經驗。」說到有份演出該節目的還有被指遭雪藏的馮盈盈，問到志偉是否他找對方？志偉承認說：「我搵佢，（喺雪櫃搵佢出嚟？）唔需要，佢之前確診，現在已經好返。（有傳節目會送獎金畀觀眾？）會送禮物，諗緊點送。」
有份擔任其中三集主持的林秀怡稱，現時公司防疫工作很充足，入錄影廠前都要做檢測，確認她們是「一線藝員」才可入錄影廠。
波波表示會以嘉賓身份參與，問是否由志偉「欽點」？她笑言是工作人員找她。問到工作方面可有受疫情影響？波波指原本今個月中拍新劇，但現時都要延遲。
