【圈中人語】超悅明駒揭開底牌
今日沙田安排十場草地賽事，以C加三跑道作賽，頭場下午一時正開跑，三T有一千一百五十六萬多寶累積，馬迷不妨動動腦筋。練馬師方面，蔡約翰、告東尼及希斯都派出多匹實力馬參戰，值得優先留意。騎師方面，潘頓、雷神及田泰安均手執不少惡馬，可作為扶手棍看待。
第一場、第一班、一六○○米。「超好日子」季內已六捷，大熟大勇當打無疑，前仗挑戰一班賽田草千四，擒下「加州得迅」捧走賀年盃；上場二班賽重返快谷草一哩又再贏，今次加至過百分出戰一班田賽一哩，馬少場合孭磅又輕，有權衝擊季內第七W。
第二場、第五班、一四○○米。「堅有料」季內已在五班取兩冠四季軍，首仗一哩贏「金剛福星」，而前仗於田草千四力擒「傲龍駒」，獲兩捷後今場仍居五班出賽，並只孭一二三磅相當着數，七歲馬難得狀態大勇，相信冇保留必要會全力爭功，只要今戰快閘擺前走，坐位望贏可做到。
第三場、第三班、一○○○米。「魅影揚飛」季內七戰取得一冠兩亞一季，自從除開縫眼罩後表現出色，十二月初回師最強直路賽，配上黃俊乃七十九倍大冷門，結果以半馬位之先爆冷得手；前仗配雷神贏馬後卻因打茅波被貶跑第二，今仗強手不多，值得憧憬。
第四場、第四班、一八○○米。「健康馬」季內出賽五次，首戰千四明顯前速不夠，路程亦嫌短，之後四戰則於田草一哩出戰，當中有三仗排大外檔，也曾在C+3欄競逐蝕盡形勢追近；再看上回在好至黏地上角逐，全程殿後，轉入直路田仔一條心掟出外疊蝕追衝刺，最後輸「連連行運」兩馬位入Q；今戰轉戰千八豈會打冇把握之仗，半冷佳選。
第五場、第四班、一四○○米。「勝得出色」前次初出田草千二，外檔起步彈出，莫雷拉俾兩步即縮雖然有遮檔，卻在馬林中搶口，末段仍肯追馬跑回一席第三；上仗加頭罩力拚入Q負於「二話不說」，賽後馬房加強備戰，鬥志鮮明綵衣逢出必拚，值得信賴。
第六場、第四班、一二○○米。「超悅明駒」（圖紫色綵衣）初出田草千二，遇超慢步速亦能克服劣勢追得出色，跑獲接近的第五；翌仗全程三疊輸俾「威力奔騰」、「美麗在線」及「風繼續吹」四乘；上仗跑好至黏地，末段遲望空力追下僅負跑第三，汲取三仗實戰經驗後，今仗已有權坐正。
第七場、第一班、一二○○米。「八仟師」前仗出戰三級賽洋紫荊短途錦標田草一千，對手甚強下，結果擊敗「好眼光」初勝級際賽；上回跑一級賽百週年紀念短途盃，配蔡明紹未能楔得好位，沿途冇遮擋走三疊而敗；埋門由雷神試閘朝氣勃勃，今次應可重現本色。
第八場、第三班、一四○○米。「合夥雄心」今季初階段出爭千四，直路以強勢擊敗「天行健」及「北極光」贏馬；剛戰跑千四黏地，全程居四五疊望空競逐，沿途蝕盡腳程下，最終仍能跑獲亞席，若今戰楔得好位競逐，可作出補中。
第九場、第三班、一二○○米。「佐治勇駒」唯一上名成績是於去季閹後復出，跑千二以終極時速追獲第二名，交出三班中級水準；今季首仗則在強組取得接近之第五；上次轉賢廄初出縮爭田草一千，路嫌短也拚得殿軍，經摸底後現回爭千二，應係打硬仗時候。
第十場、第二班、一四○○米。「包裝太保」上季埋單累積兩冠一季，然而今季踏入五歲八戰只多添一W，表現稍令人失望，莫非里程見盡？論近戰走勢均具威脅性，相信只是陣上形勢未能造就，今次續攻強項千四，轉由潘頓壓陣排靚位，可望把握機會爭取表現。
