【後來居上】榮彩大道電訊飛彈
第一場、第五班、一二○○米。「榮彩大道」翻步好慢，晨課更表現懶洋洋，一直予人是中長途馬的感覺，上季首兩戰亦報一哩，不過演出麻麻，廄主葉楚航唔甘心，二月份安排呢匹馬跑番短途，並唞夠兩個半月有多積極備戰，效果一絕竟然由蟲變龍，爆出大冷開齋；以為偶一為之，當戰贏快步速賺形勢，然而之後兩仗排外檔一樣咁醒，均得第四名。此駒今季踏入五歲，過往上陣唔多大有進步空間，況且今次出戰千二米快馬甚多，有權後上稱雄。
第九場、第三班、一六五○米。「秒秒精彩」上季中轉投告東尼，結果於谷草千二配周俊樂排十一檔，仍有本事一出即勝；之後一輪回氣，出爭田草千四配莫雷拉，結果一放到底勝出，兩次贏馬均展示既有前速亦有韌力。值得留意，此駒上季第二捷時為五月中，但告仔未有急在一時再跑，先運往從化訓練，繼而又在沙田操，此舉動或許是觀察馬匹對運送的反應；到六月開始，此駒一直在從化，先係有一個深度休息，繼而工夫重新做起，越磨越利之下，終於在十一月初季內初登場報跑一哩，結果輕描淡寫下跑第五，開氣後今次再來，走甩下對手要追談何容易？
