【網議政事】李文浩着草英國 網民笑言送瘟神
做得陰鷙事多，實冇好下場。話說臭名遠播、喺上月俾人DQ嘅前深水埗區議員李文浩噚日喺facebook上載咗張喺倫敦希斯路機場影嘅相，話自己已離開香港去咗英國，又稱自己做議員係為咗「對抗中共」云云，仲死雞撐飯蓋話自己唔係「流亡」，係「選擇離開」喎。唔少網民知道佢着草英國，都笑佢係無膽匪類：「講就大大聲，實際佢先驚！身體就係最誠實，扑（仆）到走都走唔切。」
李文浩長年喺地區挑撥仇恨同歧視，好似佢上年3月就喺議辦門外張貼「藍絲與狗不得內進」告示，拒絕服務兼侮辱唔同政見街坊；上年11月再喺區議會辱華，稱中國人等同「過街老鼠」；到上月更借住水警殉職嘅不幸事件宣揚仇警，聲稱「幾多人想睇住佢哋死」云云，隨即俾全城鬧爆喪盡天良、冷血，猶如過街老鼠。
噚日，佢喺fb公布自己已離港，仲死雞撐飯蓋話自己唔係「流亡」，係「選擇離開」，聲稱自己「已經搵到更好嘅攻擊角度」，會「積極運用知識」，「同中共對著（着）幹」喎。講到係威係勢，但臨尾又補返句︰「至於做乜嘢，多講無益，有效果自然會見得到。」講完一堆廢話，仲話「我哋會贏」。
呢種精神勝利法都引嚟唔少網民恥笑。「張展聰」學佢嘅邏輯揶揄︰「開心就得，人人都知你唔蠢，只係選擇做蠢人。」「Anson Lau」就話︰「流乜都好喇。千祈唔好返嚟就得啦。」「Raymond Cheung」亦話︰「我真係8月底已經喺英國見到你啦喎，做乜咁耐而（?）家先肯講，堂堂正正吖嘛，又唔係走佬。」
無論佢講到點樣，唔少網民都覺得搞到要走佬係佢自己攞嚟衰。好似「Arthur Leung」就指英國有種族歧視問題，相信佢好快有「現眼報」：「恭喜曬（晒），遲些領略下佢自己被人歧視的感受。」「Sam Yuen」就指英國現時疫情仍居高不下：「本週（周）英國新增30萬確診。」
亦有唔少網民形容係送走瘟神。「Kong Tang」亦話︰「D（啲）垃圾俾（畀）晒人咪重（仲）好。」「萬里行」話：「走了是香港之福！願『牠』永不回頭。」●香港文匯報記者 黃書蘭
