【網議政事】雅典示威展「獨旗」 「獨人」邵嵐被捕醜出國際
警方早前依法打擊「獨人」張掛「港獨」旗幟，班反中亂港分子即刻話係「侵犯人權自由」。不過，經常乞求外國「制裁」香港嘅前「香港大專學界國際事務代表團」發言人邵嵐噚日喺希臘雅典展示「光時」旗嗰陣，就同樣俾雅典警方拘捕。唔少網民都話依法辦事係國際標準，恥笑邵嵐今次醜出國際，要睇吓佢會唔會又賴係「政治打壓」咁話。
據外媒報道，邵嵐噚日同「藏獨」分子Tsela Zoksang去咗希臘雅典衛城，走上鐵棚架展示「港獨」旗同「藏獨」旗，仲呼籲外國抵制中國明年嘅冬奧，但隨即俾趕到嘅雅典警方拘捕，可見犯法行為喺邊度都會畀人拉，唔係示威就大晒。
網民：外國一樣不接受這些行為
新民黨中委李梓敬噚日就喺fb發帖話：「外國一樣唔接受呢啲行為。」民建聯副主席陳學鋒亦出post揶揄佢真係「×出國際」。「Daniel Kwok 」就話：「去到外面你估人地（哋）會理你係什麼『會長』，犯法就拉。」 「Ho Cheng 」都話：「好彩係希臘警察拉，如果香港警察拉又會謝（賴）話『政字（治）打壓』。 」「Jean Rice」亦恥笑班亂港分子即刻冇聲出，明寸佢哋話︰「手足救人呀！」
咁黃絲又咩反應呢？有啲人就嘗試兜返話︰「拘捕唔係問題，有冇控告先係問題。」咁嘅講法真係人唔笑、狗都吠，但亦都有黃絲忽然理性返咁話︰「咁樣做俾人拉都好正常。」唔知邵嵐知道會點諗呢？
有網民則覺得博出位惹官非都可能只係為製造課金理由。「Vickie Lo」話：「終於搵到新藉口眾籌啦！果然有辦法增加收入來源，今次堅呀！係歐羅。」●香港文匯報記者 黃書蘭
