【睇通睇透】武豐將角逐凱旋門
今年第100屆法國凱旋門大賽，雖然下月先至跑，但就肯定有星光熠熠場面，藍營同古摩亞兩大陣營明星馬對撼之外，東瀛大軍亦都來勢洶洶，「創世駒」同「緣厚情摯」將會應戰，依家唔單只日本賽駒，就連日本國寶級騎師武豊，亦已落實為日籍馬主松島正昭效力，出戰呢項盛事。日籍馬主松島正昭與古摩亞合股擁有嘅「波爾明」同「日出之國」，武豊將會任擇其一。現年五十二歲嘅武豊，今次第九度出戰呢項歐洲最高榮譽賽事，過往佢嘅最佳成績係93年一屆策騎「白口罩」以頸位飲恨跑第二，敗於冼毅力所騎「海都市」，而06年一屆夥拍日本名駒「大震撼」跑第三，可惜最後因藥檢失敗而被取消資格。今年武豊出戰本年度第100屆盛事，馬主方面亦透露，最大心願係同武豊以日本人身分攜手揚威凱旋門大賽。
另外，已退役的南非傳奇騎師勞愛德，大囝Jaden及細囝Zac子承父業，長大同樣成為騎師，近年成績唔錯。不過在澳洲昆士蘭擔任見習騎師的細囝Zac早前晨操時段不幸墮馬受傷，其左手手腕骨折，意外發生後被送到醫院接受治理。Zac其後上載在病床休息的相片到社交平台，他接受手術後看來有點疲倦，但仍然豎起右手拇指向大家報平安，展現堅強的一面。不少網友留言祝福他早日康復及多多休息，Zac表示感謝大家關心。Zac現時已回家休息，預料最少休養三至六星期，他在今季首六個星期已取得十九場頭馬，在昆士蘭騎師榜排名第二位。
