曾被批如「背對白機器」決意進修演技 好勝鄺潔楹苦練劍擊半年終過關
香港文匯報訊（記者 梁靜儀）鄺潔楹（Judy）首次演出的正劇《七公主》，因港隊劍擊代表張家朗在今屆東京奧運男子花劍個人賽奪金而提前播映，在劇中飾演永不服輸劍擊好手的Judy，亦頓成了宣傳焦點，為了演好角色，拍攝前Judy更要苦練劍擊半年。如今Judy正計劃參加演技課程增值自己。
在劇中Judy飾演方楚瑜，是一名事務律師，同時熱愛劍擊，不過去年接到監製通知要學劍擊時都嚇了一跳，她笑說：「因為劍擊都幾冷門，我又未接觸過，同埋講起劍擊我就諗起劇集《四葉草》，我仲以為搵我拍續集，後來至知係一套女性劇。」她又稱角色做事務律師是為了生計，劍擊才是她的最愛，故不介意放工後去練劍擊，正好跟她當時的生活一樣，當時她拍完《學是學非》收工後，便去跟專業教練學劍擊，回想那段刻苦練習的日子，Judy說：「開頭諗住學四個月，但因為有部分好難的動作自己未做到，所以開鏡後繼續練咗兩個月，如果你問我2020年最深刻的事，一定係學劍擊，因為我用咗半年時間去學。」
完成劍擊高難度動作
在劇中玩重劍的她，最難忘拍攝最後一場很重要的比賽戲份，因教練要她做很多世界級高難度動作，當時她還埋怨教練玩大了，但因遺傳了媽媽的「好勝」性格只好堅持到底：「雖然個角色係講我打劍擊有進步，但唔使玩到咁大，但教練話對我有信心，於是我喺拍攝前三個星期日練夜練，但到臨拍攝前都冇起色，劇組開始想搵替身上陣，監製同教練都叫我唔好勉強，我因為唔服輸心態，同埋有少少運動員的精神，堅持咗咁耐，冇理由放棄，同埋如果同人講大部分場口我自己親身上陣，除咗最尾嗰場，我會覺得好無型，於是拍心口話得。」就是因為不服輸的性格，Judy試過開完廿幾小時工之後，直落再去練劍，最後真的好神奇地完成了所有動作，她笑說：「可以大大聲聲同人講，全部動作都係我做㗎！」她又很多謝監製及教練對她的信任。
所謂台上一分鐘，台下十年功，Judy拍完劇集後亦沒有繼續練劍擊，她直言實在太辛苦了，加上她本身並非專業運動員，屬於半途出家，一下子要應付很大的運動量，的確不容易。她說：「初初開始訓練時因為好辛苦，拍完後要去拔罐放鬆，加上唔識用力，整傷咗右腳筋，事後要去做針灸，好彩好快無事。」
享受演出挑戰不同角色
Judy當年以模特兒身份出道拍攝多個廣告，其後加盟無綫，曾主持旅遊節目《3日2夜》，以比基尼泳裝亮相而受注目，之後主持資訊節目《學是學非》及演出處境劇《愛·回家之開心速遞》亦甚受觀眾歡迎，演出機會亦越來越多，經過今次演出正劇後，Judy亦計劃上演技課程增值自己：「今次同多位有經驗對手合作，喺佢哋身上學到很多，同時發覺自己演技好渣，以為自己拍過處境劇應該應付到拍正劇，原來係兩回事。」她自爆曾被導演批評是「背對白機器」，只是背足劇本，但就看不到她是在演一個角色，提點她要做一個有想法的演員，不是只懂跟劇本去做。
Judy透露稍後會接拍一部新劇，劇中要玩功夫，不過她卻很享受：「感覺上唔會被定型，因為我細細粒，人哋認為我一定演阿妹、女友同學生，其實我好鍾意接受唔同挑戰，最想演同自己本身性格反差的角色，好似林夏薇角色經歷好大變化，老公過身又嘗試自殺。」
身高150cm的Judy，對於被封為「哈比女神」，她自嘲說：「我小學學游水，中學就打籃球，去美國讀High School就參加田徑隊，我個人一直好好動，只不過冇長高，唯一解釋係基因問題，可能遺傳Daddy嗰邊，我哥哥都係166cm。」
