【獨有消息】肥仔叻叻潘頓索騎
潘頓、莫雷拉及田泰安在許多場合都有機會揀馬騎，但他們也有走漏眼的時候，即使經驗老練的莫雷拉，好似「銘記知心」咁，試過閘推庄唔騎，結果史卓豐捱義氣，首戰差點爆出大冷門。潘頓亦有類似例子，「肥仔叻叻」初出跑田草千二米，賽前他過檔彈大閘，誰不知仄過大閘，最終揀騎「錶之未來」，該仗只得梗頸四，而棄騎的「肥仔叻叻」，配何澤堯卻爆出十七倍冷門開齋，而贏馬的過程，可以謂盡顯超班馬本色，入到直路仲喺尾疊位置，只見何澤堯抄出中檔，最後四百米望空衝刺逢馬過馬，贏第二名馬「牛角仔」一位一。入到直路的初段，此駒的走規仍是賴洋洋，不過經過何澤堯一番的努力策騎下，於拉士二百米使出強烈的衝刺力，這也難怪潘頓會走雞，因為這類具懶性的短途馬，很多時在晨操會給人錯覺狀態不足，更何況該場潘頓早已有匹實力馬「錶之未來」在手，若「肥仔叻叻」不是一匹埋門沒有瑕疵的戰駒，正常情況下，潘頓揀咗「錶之未來」上陣是非常合情合理的抉擇。當然，寶走了一次便夠，這次「肥仔叻叻」再度列陣贏馬路程，潘頓一早向幕後討回策騎權，並於六月五日已重新過檔，到目前為止，潘頓經已替「肥仔叻叻」操了五課快工夫，這包括了前周的一課，上周的兩課，及本周的兩課，而最後試跑的一課，論走規越來越成熟，贏馬後的懶性亦無咁重，環顧這次對手並無了不起之輩，呢匹質新馬要再下一城並無難度。
