心甘情願忙湊仔樣變殘 古巨基自認餵奶掃風技術一流





香港文匯報訊(記者 梁靜儀)今日是父親節,圈中兩位星爸古巨基及蘇志威不約而同接受訪問,分享家中寶貝帶給他們的窩心事。基仔去年榮升爸爸,更放下工作專心湊仔,雖然樣子明顯變殘了,但他一望到個仔,心情即變好,所以也是殘得開心。基仔自言已經成為湊仔高手,餵奶掃風一流,更比老婆厲害。
基仔日前接受網上節目《靚媽圍爐》訪問,與關心妍、張美妮及孫慧雪等靚媽大談湊仔經。基仔兒子古晉匡(Kuson)還小,不會特別慶祝父親節,都是與家人吃飯慶祝,至於太太陳英雪會否為兒子準備驚喜給他?基仔笑說:「我估冇啦,哈哈……通常驚喜都係我負責製造畀佢。」
基仔為了專心湊仔,放下工作一年半,他自言樣子明顯變殘了,但殘得開心:「體力上係攰,但心靈上又提升咗。雖然疫情關係,我自己都有工作籌備中,以前遇上煩事,可能會唔開心,現在所有煩事,一望到個仔,咩都消散晒。」基仔又直言自己已經成為湊仔高手,餵奶掃風一流,比老婆厲害,但歲幾大的兒子似乎有半夜夢遊習慣,所以至今他都是與老婆輪班通宵守候:「發現佢夜晚瞓瞓吓,會矇矇鬆鬆咁坐喺度,或者會爬起身企喺床,真係唔係好放心,輪流通宵更睇住照顧佢。」
囝囝聽《傷追人》感動落淚
節目中基仔又分享了生活短片,其中一條是Kuson聽到基仔唱《傷追人》,竟然感動到流眼淚,樣子超可愛。基仔說:「雖然知道自己的歌會感動到人,但真的沒想到咁細個BB會聽到流眼淚,非常意外及震撼,相信囝囝是一個感情敏銳的人。」他又指兒子亦喜歡聽K-POP,特別是韓國女團MOMOLAND唱的兒歌《Banana Cha Cha》,他會跟住跳舞。為怕錯過兒子成長的過程,基仔每天都會拍下大量影片,節目中另外一條片更看到他在餵奶,而古太就大跳餵奶舞,引BB食得開心,十分搞笑。
說到作為父親最難忘的時刻,基仔說:「 Kuson第一次叫爸爸、hea講『I Love You』都令我非常難忘,早幾個星期前,我同太太連續幾日示範錫錫,估唔到囝囝看了幾次就學會了,主動去錫我個嘴,令我非常驚喜。而最心痛回憶就是囝囝第一次打針,見佢爆喊,媽咪望都唔敢望。」
基仔自言在家中是扮演衰人角色:「因為囝囝性格太好奇,乜都要知、乜都要掂,但如果我覺得係危險嘢,我就會好嚴格阻止,媽媽做好人囉,媽咪好心軟乜都畀佢搞。」雖然他當了家中衰人角色,不過兒子照舊好愛爸爸:「因為佢要睇電視一定搵我,屋企個電視幾複雜吓,冇人識開,又或者我食雪條,佢會跟住嚟要食。」他又稱不想兒子太早有讀書壓力,加上疫情關係,覺得要安全為主,故並不急於安排兒子返Play Group。
蘇志威難忘愛女手製禮物
而蘇志威聯同太太劉小慧、細女蘇靖珺(Ina)及香港開電視主播馬梓軒拍攝父親節特輯。小慧與Ina率先炮製甜品冰火橙花年糕,向蘇志威送上窩心驚喜,品嚐後更讚不絕口給予100分。談及會怎樣慶祝父親節,蘇志威表示:「其實我哋一家人好少慶祝節日,我覺得只要每日開開心心咁過就已經可以!」
雖然蘇志威一家每年父親節都是簡單慶祝,然而他亦很難忘細女Ina數年前送贈的一份父親節禮物:「Ina未夠10歲嗰陣,親手製作咗一個捕夢網畀我,只要將佢掛喺床頭,瞓覺嘅時候就會舒服一啲,所以直到現在,個捕夢網都一直掛喺度,係我好鍾意嘅一份禮物!」
問到對父親蘇志威的感覺,Ina指對方比較和善,小慧聞言即笑說:「即係比起我嚟講,爹哋比較和善係咪?」至於蘇志威則大讚女兒:「我覺得佢好有時尚觸覺,尤其對美學呢方面!Ina好鍾意研究漢服,佢現在會喺屋企製作髮簪,整好之後又會戴住問我哋靚唔靚,係一個好活潑同好有創意嘅小朋友!」