【網議政事】攬炒又發「獨」論 狂言「燒死」建制
激進攬炒派追求嘅香港究竟係乜嘢樣？日前佢哋畀出答案，原來就係會用恐怖酷刑對待建制派人士。近日就有唔少攬炒派喺連登妄想香港「獨立」之後如何「處決」建制派人士，唔少人揚言用「當街燒死」等種種恐怖酷刑。如此滅絕人性嘅話都講得出，原來呢啲就係佢哋追求嘅香港社會，任何有良知嘅人都唔應該再同呢班人為伍。
攬炒派喺前年修例風波期間，火燒市民、打砸商舖等所作所為，已經叫全世界領略到佢哋嘅慘無人道。而經過咗咁耐，都仍有人死性不改，係咁想香港變得激進分化。
連登仔「花生醬走奶」日前喺連登以「香港『光復立國』之日，應如何『處決』建制派人士？」為題發帖，則引嚟唔少狂徒跟帖，揚言要用極殘忍酷刑對待建制派人士，言論猶如恐怖分子。
好似「賀拔岳」稱：「公開處刑，可以參考下（吓）中世紀燒女巫、阿富汗塔利班石刑、滿洲式凌遲。」
「堅離地陳豪」亦稱：「滿清十大酷刑，但要俾（畀）我揀嘅話，我會揀用十字架呢個酷刑，夠殘忍啦！」
「yinnlaa」更揚言：「當街燒死。」殘忍程度令人咋舌，可見攬炒派近年標榜嘅所謂「民主」理念早已變質，同和平、多元包容嘅真正普世價值及香港核心價值完全背道而馳。 ●香港文匯報記者 黃書蘭
