【網議政事】「立場哥哥」食閉門羹 竟鬧銀行準時收工
成日覺得全世界要圍住自己轉嘅咪黃絲囉。好似《立場新聞》副採訪主任、記協執委會副主席陳朗昇呢種人，日前就喺facebook自爆喺銀行留難職員，因為銀行夠鐘閂門自己入唔到去而發爛渣，「怒罵了20分鐘，很大聲、很激動。」黃絲最識得道德綁架，身為黃絲KOL嘅佢梗係明白呢個道理，講到自己咁樣係為咗老人家、打工仔同社區。不過，就算佢哋自己友都有人唔buy佢嗰套，覺得佢無視規矩、惡人先告狀，仲揶揄咁都仲有黃絲追捧佢，黃圈質素係咁上下。
喺修例期間經常同喺暴動前線維持秩序嘅警員嗌交嘅陳朗昇，畀班黃絲捧為「立場哥哥」，近排仲成為咗KOL。日前，佢喺社交平台fb發文，話自己搭正銀行閂門時間4點半去到滙豐銀行，打算拎返張提款卡，佢前面就有「頭髮斑白的叔叔」同埋「中年姐姐」，銀行職員同佢講銀行已經閂咗門，「沒有多一句解釋，沒有多一句說話。結果我火了，我說現在4時30分，只有我們三個客人，你都不願意去接。」
上綱上線稱為民爭取利益
身為黃絲KOL嘅陳朗昇，最擅長上綱上線、道德綁架，為咗達到個人目的，佢開始戲精上身。佢同一位銀行職員話：「滙豐銀行是香港人的銀行，大部分香港人收工都收六點，用不著（着）你們的服務，要去銀行竟然要攞假。是否每一位打工仔攞半天假去銀行辦手續？」
最後終於有位銀行經理接待佢，聽咗佢嘅投訴，又話會訓示同事好好處理關門嘅安排，陳朗昇才作罷。明明想滿足私慾，但就要講到為咗幫大家爭取利益，仲要配張銀行閂門後長者去銀行嘅相話：「你看銀行四點半關門之後，還有很多長者不知道，希望去銀行。」
fb專頁「無神論者的巴別塔」就轉貼咗陳朗昇嘅發文，批評佢自己遲到入唔到銀行，仲要惡人先告狀：「咁×垃圾嘅人可以走去做垃場高層，仲可以以『傳媒前輩』身份對公民記者指指點點，然後仲有一大堆黃屍走去吹捧，『黃圈』咪×係咁×樣嘅質素囉」。不過佢發呢篇帖文嘅目的好似都唔單純，鬧完一輪後仲要附上一個自己去年寫嘅關於陳朗昇嘅付費文章，等人幫襯。
網民批野蠻替銀行員工不值
對於陳朗昇咁野蠻嘅行為，好多網民都留言鬧爆。「Ka Po Kwong」就替銀行員工感到不值：「因為香港金管局同銀行公會對銀行營業時間係有規定的條文監管的，過咗法定營業時間銀行職員基於保安理由係有權唔再比（畀）人入去！如果係法定營業時間以外，銀行職員開門給客人進入銀行而因此被劫匪打劫的話，保險公司有機會不作賠償。而所有的捐（損）失係由銀行同客人付（負）責的！」
「WS Chan」就狠批陳朗昇：「一個二個都話要通融，咁邊個體諒d（啲）銀行前線員工呀？ 你自私就自私啦。」「柯佩誼」就話：「老馮（奉）就你？明知人地（哋）幾點關門，自己唔識早啲去？寫到明嫁啦，眼盲定文盲？」「Sharlotte Siu」嘆道：「有啲人最想就係投訴到人冇左（咗）份工。」
●香港文匯報記者 倪思言
