【貴圈真亂】與警合作即成「鬼」 攬炒區會爆內訌
內訌對攬炒派嚟講已經係家常便飯。有網民近日喺「連登」開post，批評由攬炒派主導嘅灣仔區議會，早幾日竟然通過咗一項講明會同警察合作嘅動議，仲回帶話灣仔區議會嘅攬炒派議員已經唔係首次倒戈，質疑某啲自稱「民主派」嘅議員私下同建制串通喎。有被質疑係「鬼」嘅議員不甘示弱，喺facebook開post反咬係某啲「同事」唔抵得，所以夾埋助理喺「連登」開post搞事，究竟件事嘅內情係點嘅呢？
網民「Revale」近日喺「連登」開咗個題為「『警世』建制派已成功攻陷灣仔區議會」嘅post，內文稱運輸署多年嚟一直想移走銅鑼灣利園嗰邊嘅行人專用區，畀更多空間車輛行走，但區內街坊一直都好反對喎，於是攬炒派灣仔區議員就動議「要求運輸署按照『香港好易行』政策，就啟超道、白沙道、恩平道和蘭芳道一帶，重新制訂『以人為本』的改善方案，在此之前，維持白沙道部份（分）時間行人專用區安排不變」嘅議案，點知呢個動議喺「民主派」佔多數嘅灣仔區議會入面竟然過唔到。
素人私怨擺上枱
「Revale」就解釋，原來曾經做過警察、前「灣仔起步」嘅邱汶珊「竟然」聯同建制派議員否決動議，仲贊成通過修訂咗嘅動議，而動議入面就多咗同警方合作嘅字眼。
「Revale」又幫大家回帶，話原來灣仔區議會去年開大會期間，竟然否決將「反對基本法第二十三條立法」納入議程，票數仲要係8票反對、4票贊成。
明明灣仔區議員得4位建制派議員，另外嗰4張反對票喺邊度嚟嘅呢？睇返有關報道，原來嗰4票係嚟自張嘉莉、梁柏堅、邱汶珊同李永財4位「素人」。
網民「正所謂臭罌出臭草」就話：「灣仔內訌其實唔係第一日嘅事。」「WeddingPeach」就話：「個（嗰）4件素人好似一直都同楊雪盈（灣仔區議會主席）唔啱牙，夾雜好多私怨因素……但見到梁柏堅不論係（喺）網上定區議會啲態度都係令人覺得佢情緒永遠蓋過理性，好似特登要將佢同楊雪盈啲私怨擺哂（晒）畀全世界睇咁。」
被批評嘅梁柏堅當然不甘示弱，於是就喺fb出post批評某啲同事同助理夾埋搞事：「打手呀達，你哋班友自己無能，又諗住喺連登開鬼Acc帶風向？次次動議俾人修正就諗住用依（）啲垃圾方法去質疑我哋幾個悶唔悶呀？講鬼點鬼得過你哋？灣仔區議會啲某同事同佢哋啲助理真係一潭污水。」 ●香港文匯報記者 雨航
