網議政事:呂智恆擔保人忽變養母 網民譏是否記錯台詞
攬炒派47人被控「串謀顛覆國家政權罪」，法庭日前處理有關保釋申請，唔少被告嘅親友都齊聚喺庭外賣慘。被告之一呂智恆嘅擔保人、報稱係其「養母」嘅Elsa，日前喺律政司就保釋批准提出上訴後，喺法院地下瘋狂尖叫，又跪地痛哭，成為唔少黃媒炒作嘅題材。不過，有網民揭發Elsa同呂智恆喺2017年接受媒體專訪時，仍係以夥伴、老師相稱。唔少網民見佢哋忽然變養母養子關係，都憶起攬炒派盛產戲子，揶揄佢：「養母！你係咪記錯台詞呀？」
修例風波期間，唔少戲子被揭做戲抹黑警方。好似「7．21元朗事件」中「搵唔到仔」嘅「普通街坊」趙寶琴，喺傳媒鏡頭前哭叫「打唔到999呀」一幕悲情戲碼賺人熱淚，事後佢就被揭其實係「政治常客」、攬炒派朱凱廸團隊嘅「朱隊友」。
曾與攬炒派毛孟靜開記招抹黑警察修改通例、以「牧師」裝扮示人嘅姜嘉偉就仲「盞鬼」，佢被揭「自封牧師」、自印「終身有效」嘅所謂「牧者義務基本急救證」，仲印埋「記者證」?，成為黑暴現場嘅「三位一體」。
今次呢個Elsa日前喺庭外涕淚交加，喺法庭外大叫「法治已死」，成為黃媒嘅報道主角後，隨即俾facebook專頁「BlueBase」踢爆前言不對後語。原來，呂智恆同Elsa早喺2017年就赴台灣詆毀內地，當時網媒「風傳媒」同佢哋做咗個題為「還相信『一國兩制』，中共會『殺死你』！香港年輕人來台絕食痛訴中國如何造就『地獄』」嘅專訪，當時文中就以「社工呂智恆與夥伴Elsa來到台灣」嚟描述兩人關係，並形容「呂智恆說Elsa是他的『老師』」。
「BlueBase」話：「一名自稱是呂智恆養母叫Elsa的女人，西九龍裁判法院外，在鏡頭前七情上面，情緒失控，贏盡傳媒焦點。不過有由 2017年10月04日，由風傳媒報道的一篇文章中可見到，呂智恆只當Elsa係老師。 而呂智恆和Elsa都是排斥內地之人。」
唔少網民就笑呢個Elsa前後矛盾，連做「茄喱啡」都冇資格。「David Ray Chan」話：「養母！你係咪記錯台詞呀？霞姨（電影《喜劇之王》中嘅臨時演員領班），以後唔好再用佢喇！」「Wa Chio」就話：「霞姨知道了，連台詞都可以記錯、講錯！咁嘅演員永不錄用仲要飯盒都唔俾（畀）。」「Chan Chun Fun」就笑係劇本問題：「上次麥記老母搵仔，今次啲稿又係咁，淨係換人係唔夠咖（㗎），錯晒！」
●香港文匯報記者 黃書蘭
