【網議政事】「獨人」中出羊子斥羅冠聰「走佬抗爭」謬論
攬炒派成日都跌落地揦返拃沙，着咗草都要講到自己仲「抗爭」緊，咁咪俾人寸到無地自容囉。已經「走佬」英國好耐嘅前「香港眾志」主席羅冠聰，日前就喺facebook發文講BNO「5+1」移民政策，佢仲話移民去英國嘅港人，要通過自己嘅努力令英國社會接受自己嘅「價值」，最終目標係為香港攞返「民主」，減少留喺香港「手足」嘅「痛苦」喎。咁奇幻迂迴嘅情節，就引嚟「港獨」分子睇唔過眼，鬧爆佢貪生怕死同荒謬嘞。
羅冠聰家喺倫敦尋求「庇護」，佢已因為涉嫌違反香港國安法被通緝。日前就喺fb發咗篇千字文，畀有意移民英國嘅港人做「思想準備」。佢喺文中話，移民嘅目的係要累積足夠嘅影響力，令香港「重拾自由」，得到允諾嘅「民主」，減輕仍然身處香港「手足」嘅痛苦，最終等啲「流亡」海外嘅「手足」可以重回舊地、「政治犯」重獲自由，享受應得的政治權利。
「港獨」分子中出羊子就直接喺評論度，鬧爆羅冠聰顛倒因果。佢話：「你哋幾個夾帶私逃，貪生怕死，就同香港嘅『黃色』醫護人員一樣，聲稱『罷工抗疫』一樣咁荒謬，如果罷工可以對抗病情，逃亡可以革命，咁樣我相信你食屎都可以痾（屙）飯啦。」
網民譏羅「眾籌去旅行」
網民「Maggie Chan」亦鬧爆羅冠聰，如果「好×中意香港」點會「飛走」，又譏佢「眾籌去旅行」，叫佢「離開之後就唔好再講香港的政治了，唔關你事」。
「Johnson Cool」就留言寸羅冠聰所謂嘅「國際線」︰「聰仔堅守咗乜嘢國際戰線？佢做咗乜？可唔可講幾個實例嚟聽吓？」 ●香港文匯報記者 杜思文
