【街談網議】「光榮」食品水準差 「手足」：卡位有尿味
唔少「黃店」出名難食。好似「黃店」「光榮冰室」日前喺facebook發帖，上載咗張到其他「黃店」試食嘅相，稱要「剌（刺）探軍情」。點知班「手足」一見到，就紛紛留言大呻光榮多間分店食物水準差，有網民仲話：「差咗之餘青山道店入邊卡位有尿味！」
「光榮冰室」日前發帖話要「剌（刺）探軍情」，搞到班「手足」以為佢係想檢討食品質素，引嚟唔少中過伏嘅「手足」大吐苦水。
叉燒「餿餿」哋 沙嗲牛食到嚿根
「Raymond Sen」咁話：「呢排荃灣同尖沙咀既（嘅）食物水準差左（咗）。D（啲）蛋已唔滑啦。請留意下（吓）！」「Kirsty Wong」就話：「有人講開我都想講，尖沙咀店個個星期都去食，但（上月）29號果（嗰）日朋友食叉燒煎蛋飯，啲叉燒叔叔（餿餿）哋。」
唔少「手足」都話光榮出品每況愈下。「龍馬」話：「九龍灣間光榮茶記係咪真係你哋，食過5次、一次比一次難食，定我去錯咗唔係你哋分店？」「Michael Wong」就話：「沙嗲牛越泥（嚟）越渣，經常食到一舊（嚿）根，完全咬唔到，又冇乜沙嗲味。」
有「手足」就話連服務、衞生都出事。「CC Cly」話：「唔知你個男同事點落單，叉燒一丁變意粉、熱奶茶變凍奶茶，叫唔要碗滾水又照比（畀），倒到成個袋都係。」「Mak Mak」亦呻：「（上月）25號喺九龍灣訂咗個聖誕派對套餐真係有少少甩碌（轆）。」「Man Ho」更話：「差咗之餘，青山道店入邊卡位有尿味！」其實咁難食，咪唔好幫襯囉。 ●香港文匯報記者 黃書蘭
