【網議政事】批望夫石被塗鴉 網民反被「黃絲」起底
由細到大，老師都教大家要愛護大自然，尤其係唔好手多多破壞花草樹木，但有一班「黃絲」嘅價值觀就扭曲到令人擰晒頭，竟然大讚破壞自然環境、畫花石頭嘅行為，仲要對提出意見嘅網友「起佢底」，唔怪得之人哋話：「人一黃，腦便殘。」
網民「YimMan Yeung」喺facebook「沙田之友」專頁發文時，貼上一張「望夫石」被畫花嘅相。睇真啲，「望夫石」上除咗畀人寫上「革命之火」四隻大字，仲畫咗好多把黃色雨遮，仲嬲到話：「可唔可以俾（畀）啲公德心啊，唔知以為自己好×型，畫到人哋太太（大大）咁樣！」
「望夫石」畀人畫花本來應該「人神共憤」，但點估到一班「黃絲」竟然會鬧返「YimMan Yeung」轉頭，個個圍住批鬥佢，話佢有道德、環保嘅思想喎，甚至支持畫花石頭。「Jane Hea」就強詞奪理咁話：「石頭可記錄香港人的歷史，香港印記，有咩（乜）問題，又唔係喺文化遺址上畫……」「June Law」就話：「好靚喎！2020最靚壁畫。」「Jojo Liu」就無理搞三分：「石頭本人都沒說話，她在啊乜×。」
可能見大家都圍攻自己，「YimMan Yeung」其後再解釋：「各位唔好太敏感，不要對號入座，扯上政治，本人喜歡大自然，唔明點解要破壞啫。」
身為「黃友」嘅「Matthew Kwan」亦忍唔住講句公道話：「公道說話，黃還黃……我覺得貼文宣都可以，噴油真係好破壞環境，我覺得『黃友』起碼知咩叫公德心……」
但係，所謂「人一黃，腦就殘」，大多數「黃絲」非但無放過「YimMan Yeung」，更將佢個人照片公開畀大家「公審」，繼續進行網絡欺凌。「黃絲」嘅價值觀真係可怕，保護環境明明係大家應該有嘅道德意識，睇嚟佢哋真係需要重新接受教育喇。 ●香港文匯報記者 倪思言
