話健吾恥笑「手足」 區諾軒吹雞unlike
冇晒靠山嘅攬炒分子可以點博出位？學吓區諾軒咁撩交嗌啦。攬炒勢力近日可謂土崩瓦解，往日肯俾區諾軒黐金糠嘅前「中箭（香港眾志）」成員一係着草一係踎監，被遺棄而無得呃「光環」嘅區諾軒近日就諗咗個方法刷存在感，就係喺facebook開post數臭原名葉鍵濠嘅商業電台節目主持健吾，話健吾唔應該喺節目恥笑「手足」、羅冠聰同周庭喎，仲小器到叫自己啲朋友unlike健吾個fb專頁，然後雙方就開始隔空駁火，仲搵咗唔少人圍爐，難怪網民都「讚歎」區諾軒嘅「方丈」本色有增無減。
區諾軒近日喺facebook狙擊健吾，話自己對健吾恥笑諷刺「手足」嘅行為都「一一看在眼內」，所以自己「發功」後，幾個鐘內已成功令健吾個facebook專頁少咗100個like，又義正辭嚴咁話自己已經體諒咗健吾好多年，只係對方「一刀一刀插過黎（嚟）」喎。
區諾軒仲想同健吾搶生意，話對方成日寫嘅飲飲食食嘢，由佢嚟寫亦都冇問題，其他KOL亦不妨將佢同健吾嘅post比較，「因為比較得多，我會有更多click rate（點擊率）」。言下之意，即係從政嘅區諾軒為咗博like，日後都會寫好多飲飲食食同買衫嘅post？
職工盟清潔工會幹事杜振豪就即刻響應區諾軒嘅號召，仲講到自己好似做善事咁，只係「突然」發現自己已被健吾block咗：「天地良心，近幾年都沒有去他的page留言啊。佢咁多fans，點敢呀。」
容樂其：區諾軒俾人當condom
俾人踩到上心口嘅健吾亦發帖還擊：「從政者，最忌自己同KOL比較。我呢種人，唔使養人，唔使靠女人身體上位先做到立法會議員」、「我有時都唔明，呼籲人unlike我既（嘅）政（治）工作者，佢地（哋）倡議過咩？」社民連前副秘書長、《輔仁媒體》總編容樂其都忍唔住插嘴：「區諾軒咁叻就唔會俾（黃）之鋒周庭當condom啦。」
點知區諾軒噚日又開post炫耀自己嘅unlike行動有幾咁成功，似乎想顯得自己好有影響力：「掃完一個又一個，橫掃千軍」。佢又幫自己搭高台話「我早早淡出政界」，擔心健吾日後為咗搵位攻擊佢而患上「斯德哥爾摩症候群」。
嗱，區諾軒呢副嘴臉以前已經引起唔少舊債，不過佢俾人睇死都無可厚非，事關當年佢作為周庭Plan B先有得當選立法會議員，入到去就肩負為「中箭」人支糧嘅責任，點知周庭最後贏咗個選舉呈請，搞到區諾軒做咗一年半就冇得撈嘞。?家周庭踎監，區諾軒想上位真係唯有四圍辣火頭啦。
網民：愈嚟愈小器 「方丈」追唔上
「Sabrina Ma」就話冇眼睇：「我睇到佢（區諾軒）嗰個post，我真係覺得好小學雞，佢哋成班人，包括啲支持者，到左（咗）宜（?）家都重（仲）當政治係啲宮鬥劇咁玩，又話分化又話放負又話乜又話物。」「羅家謙」就直言：「立法會收左（咗）×就冇曬（晒）存在感。」「Boris Leung」就話：「區諾軒真係愈嚟愈小器，『方丈』拍馬都追唔上，不過真係好無聊，寧願同小朋友玩泥沙都得意過睇佢哋發噏風。」 ■香港文匯報記者 雨航
