網議政事：聰峯倫敦歎茶 被譏渴飲「手足」血
攬炒派最叻叫人衝，自己鬆，前「香港眾志」創黨主席羅冠聰日前喺fb貼出同棄保潛逃嘅民主黨前成員許智峯喺倫敦飲嘢嘅合照，話要同佢喺「『光復香港』路上共同努力」云云。民建聯立法會議員張國鈞亦喺facebook貼咗羅嘅帖文截圖，形容呢啲叫「笑談渴飲『手足』血」，「錢就佢袋，監就你坐。」有網民亦揶揄兩個通緝犯話：「錢已經袋袋平安，又可以逃避刑責，梗係飲得杯落，發夢都會笑醒。」
羅冠聰今年7月去咗英國，8月就俾香港警方通緝。而許智峯此前棄保潛逃經丹麥走佬到倫敦，其後亦都被通緝。正當「黃絲」叫呢兩個人要「保重」、覺得佢哋好「悲壯」時，羅冠聰日前就貼出二人開心飲嘢嘅合照話︰「人在海外，互相扶持，總有能為香港付出的角色崗位」，又hashtag話「兩位都係2016立法會港島區當選人」、「如今都要『流亡』了」。許智峯亦好識做地轉載帖文，又話同羅冠聰見面令佢百感交集，「現在我們就正式做隊友，繼續為香港打一場硬仗，為了仍在受苦的手足，拚死也要打下去。」佢又話，「國際戰線」需要好多分工同策略嘅討論，感謝羅嘅分享喎。真係講到飲杯嘢可以「拯救世界」、賣甩啲等坐監嘅「手足」都係為大家好咁。
網民鬧兩人為謀政治利益
兩人畏罪「着草」，大啖「手足」嘅「人血饅頭」，唔少網民鬧爆佢哋無恥。「WaiSam Ng」贈詩話：「我自眾籌向錢笑，着草肝膽兩昆人。」「Melb Chu」認為兩個人聚埋一齊都係為政治利益：「兄弟關係建立於『錢』字，成也是『錢』，敗也是『錢』。」
見到如此情景，咩叫「兄弟爬山，齊上齊落」？「Nelson Chung」就話︰「兄弟爬山，有人踩住人膊頭上到山頂，有的怕高，原地踏步，有的行精面捷徑跌死，這是規律。」唔知佢嘅獄中「手足」，包括前黨友黃之鋒、周庭等點諗呢？
■香港文匯報記者 杜思文
