「黃絲」稱「抗爭」被警踢 被揭作嘢眾籌呃錢
「黃絲」為咗眾籌真係費盡心思，但個呃錢門檻?家愈來愈高。近日有位叫「哈你波特大」嘅網民喺「連登」開post，聲稱自出生起就患有罕見疾病，仲圖文並茂咁講話自己做過十幾項手術，目前仲要靠接駁機輸營養奶維生，點知喺修例風波期間因為「不知從哪裏冒出來的勇氣」而走咗上前線「抗爭」，但因為某次行動中被警察踢歪咗造口管，加埋修例風波「揮之不去」嘅畫面，令佢喺醫院嘅精神科、內科、臨床心理科、婦科、腸胃科穿插，事後仲因為與家人政見不一而被趕出家門，如今「山窮水盡」，希望「連登」網民可以捐價值25萬港元嘅比特幣畀佢。咁驚為天人嘅遭遇連一向盲撐嘅「黃絲」都睇唔過眼，後來仲踢爆事主作故仔呃錢。
事主喺post叫大家稱佢為「蘇蘇」，又上傳咗好多相嚟證實自己嘅慘況，例如開刀留低嘅疤痕、一排排營養奶同輸奶機、醫院各科嘅覆診紙，當然唔少得「光復香港」嘅紋身、「豬嘴」同頭盔呢啲「勇武」嘅標準配備。
叫捐比特幣畀佢 教點樣轉賬
「蘇蘇」又稱，自己屋企人係傳統「藍絲」，近日因為政見立場所以被趕出家門，「租了只有八十呎卻要四千五（元）的劏房，還有九千多（元）一個月的營養奶，積蓄已剩下三位數。」
點解佢唔搵嗰啲乜乜基金幫手？「蘇蘇」就話因為佢冇正式被檢控，又唔希望被冠以洗黑錢或國安法嘅罪名，所以就叫大家捐比特幣畀佢，仲溫馨教埋大家點樣轉賬?。
睇到呢啲小說都未必見到嘅劇情，「連登」網民都突然福爾摩斯上身，紛紛找碴。「十三月」就質疑：「又精神科又心理科，仲咁清醒寫咁大篇文，諗埋用比特幣真係無得彈。」「十一月雨」就「讚歎」：「而（?）d（啲）疑似騙徒真係好神，搵到咁多相返黎（嚟）。」「ianndior2」就好奇：「點解自己個身體咁樣仲要做前線？」「霹啪你個龍的洞」就話：「唔敢講點樣呃錢？」
「我想做一個茶壺」同「係男人就頂硬上」就喺另一個post踢爆「蘇蘇」呃錢，包括上載疑似「蘇蘇」本人識行識走嘅instagram相片，而且個紋身幾乎一樣。佢哋踢爆「蘇蘇」如果有咁嚴重嘅病係跑唔郁，冇可能做到前線，仲話佢明明飲酒食雞煲但就聲稱自己食唔到任何嘢，以前已有多次呃「手足」錢嘅前科，只係今次獅子開大口要成二十幾萬元。
「hsksllappsbk」就建議「蘇蘇」「自證清白」：「搵『黃』區議員或《蘋果》fc（查證）先，『黃圈』實在太多人呃錢。」「蘇蘇」就疑似扮傻，先係話唔知搵邊個「黃」區議員喎，後來又應承會搵。「蘇蘇」至今已經消失咗一周，睇嚟大家都知咩事嘞。 ■香港文匯報記者 雨航
