【監察新科議員】泊位加緊成年 伍健偉扮「爭取」
明眼網民踢爆：十幾日前寫封信，政府即落實車位？
攬炒派元朗區議員伍健偉日前喺facebook發帖領功，話係自己向運輸署「爭取」加建區內電單車泊位後，得到正面回覆，仲上載埋有關臨時施工圖則，等街坊都以為佢做到政績。不過，有網民就喺伍健偉自己上載上fb嘅運輸署公函發現，原來所謂「爭取」，只係佢喺本月10日電郵要求路政署加泊位，其後運輸署收到路政署轉介，喺本月16日覆返伍健偉已計劃於該處增設泊位。事實上，政府喺一年前已經開始加緊泊位，實在唔關伍健偉事。有明眼嘅網民就踢爆佢喺度扮「成功爭取」：「十幾日前寫封信，政府立即就落實到車位？」■香港文匯報記者 黃書蘭
伍健偉日前喺fb係咁講嘅：「現時電單車泊位明顯供不應求……我們向運輸署反映及爭取後，獲得正面回覆，希望工程盡快展開，工程展開期間，造成的影響亦請見諒。」
佢仲上載埋有關臨時施工圖則，同一封運輸署公函。運輸署喺封公函度講：「有關你本年11月10日致路政署有關題述事宜的電郵已由路政署轉介本署跟進……本署已計劃於天龍路增設電單車泊位，並已向路政署發出施工通知書……路政署表示正就該工程申請挖掘准許證及擬備臨時交通安排圖則，以呈交予有關部門審批。」
有網民就質疑若伍健偉發封電郵就「爭取」到，「Hok Yin」咁話：「將一年前已落實的電單車泊位，在11月10日求其出封信便當成自己功勞？」「李家家」就話伍健偉唔誠實：「若然如實講的話，應該說是你上任前別人已落實，現在你又去信再落實，咁就『如實』，封信有日期㗎，寫到好似靠你十幾日出封信，政府就回覆作實，咁政府真係100分囉！俾人話你『騎劫』，就失禮街坊啦。」
被識穿後 伍即發爛渣死撐
被人識穿後，伍健偉就發爛渣死撐：「上任前落實左（咗）未，我同居民都無從得知，收到居民反映泊位問題，我向署方反映，然後對方覆我有打算做，但係未批，咁到底上任未批嘅野（嘢）係唔係落實？……大馬路擴闊零六年話落實到依（）家都未做，唔通又當做咗？」
前任區員：想將工程當自己政績
該區前議員李月民噚日接受香港文匯報訪問時指出，有關泊位工程係他去年在任期間落實，並分兩期進行，第一期早於去年7月完成，增加咗4個泊位，第二期則因黑暴喺該區四處破壞而延誤多時，若有支持黑暴嘅攬炒派議員想將工程當係自己政績，認真厚顏無恥。佢仲話，作為當區議員，連有關泊位係運輸署負責嘅基本常識都冇，錯誤將電郵畀咗施工部門路政署，貽笑大方。
