【騎練軍情】藍海策略矢志交代
葉楚航今次夜賽出六駒，其中三駒搵周俊樂幫手，在周一最後試跑朝葉廄所有戰馬操練完畢後，倉主逐隻戰馬檢驗蹄甲及仄馬腳。周二見周俊樂入倉睇其三匹戰馬，分別是「電訊飛彈」、「藍海策略」（圖5號）及「佳景福星」，三駒均由助手在地堂踱步，騎練則在欄邊觀察，睇完踱步騎練又上寫字樓，原來是睇各駒近仗的競賽片段，花了半朝時間，作賽前商討軍情及戰術。「電訊飛彈」今季在田草千二米上名，查其父系的子嗣特性，短途至中距離均合適，個別馬匹的窄場性能是特佳，如「天祿」、「載譽歸來」及「夢幻戰士」等，所以千祈咪以為「電訊飛彈」唔合一哩進取。
至於「藍海策略」及「佳景福星」，前駒今季三度成為二奶，有兩次僅以短距離飲恨，假如一早搵樂仔幫手，可能會改寫歷史，不過今次都未遲，馬房手足透露，目前呢匹馬嘅狀態依然咁弗，機會坐二望一。而該匹「佳景福星」，咪以為佢跑慣一千米直路賽，今次轉跑谷戰會唔識轉彎，其實上季國際騎師賽日，馬房安排佢出戰過谷草一千米，配麥道朗騎排十二檔，雖然輸咗返嚟，但只輸俾頭馬「閃電精靈」三個身位，呢類一次貨仔交易賽事，必然鍊盡胯下坐騎，大家不妨用此仗作實力推算，如今跑千二米對手一般，亦咪睇輕佢，有可能因為田戰冇乜適合賽程，轉場地搵食不出奇。
怪獸廚神增添進帳
以為上季僅僅贏夠獎金畢業，今季就有好日子過的何良，日前又有隻二班馬「盛大光輝」轉倉，呢一隻二班馬經已係馬房最高班嗰隻，如今亦轉埋倉，日後靠贏獎金，相信要多贏兩隻低班馬才可補數。既然事實經已發生，倉內上下只有腳踏實地，做好每個環節爭取成績。今次何良所派四駒，當中有兩駒是倉主特別緊張，近日經常炒三味打磨，牠們分別是「木火同明」及「怪獸廚神」，皆屬梁家俊坐騎，這兩駒的三味活動，計是先到機坪踱步，繼而去游水池游水。據馬房手足所述，兩駒狀態都冇得頂，當然，有人顧慮「木火同明」今次排十二檔跑千二米，不過，當馬房鬥志達到高峰，任何檔位對贏馬決心都起不到懷疑態度，這匹「木火同明」有賠率下更是值得一博。另外一匹「怪獸廚神」，雖然在谷草一千米開齋，不過，馬房認為呢隻馬有一定長力，千二米必可應付，何良今次有冇頭馬進帳，就靠晒梁家俊呢位本地薑。
名牌效應補針催谷
呂健威贏完「金鎗六十」後，馬房士氣如虹，對於國際賽信心十足，至於今次夜賽，馬房亦有兩駒準備就緒，一匹是「名牌效應」，另一匹是「信心滿滿」，周一最後試跑朝，兩駒均被安排到機坪踱步，據悉，服侍兩駒的馬房手足均指牠們有極佳水準。「名牌效應」早於個多禮拜前打過BV補針，而兩駒均已轉食美國料，所以牠們經常會出現打蹄現象，當中「名牌效應」反應更強，無論踱步後，或者游完水後，均見牠有打蹄現象，倉主卻嫌這駒躁火太猛，這兩日更安排牠到沙池打滾洩火，今次這對呂廄馬均是爭取頭馬的希望。
