【網議政事】不忿報道「大細超」 巫堃泰封殺《獨媒》
攬炒派屯門區議員巫堃泰近日喺facebook發千字文，怒斥《香港獨立媒體》無經過佢同意下，就將佢嘅議員辦事處作為社區報《屯敍》嘅取閱點，加上早前《獨媒》採訪咗佢個幾鐘有關唔參與違法「初選」嘅事，結果見報時得「零散數段」，但參與違法「初選」嘅朱凱廸及張可森就每人兩頁訪問，令佢「難以認同」，仲話《獨媒》喺佢報名參選立法會時扭曲佢嘅講話，以後都唔會再接受《獨媒》嘅訪問或查詢。真係立即封殺又得，得咗。
拒議辦作社區報取閱點
巫堃泰近日爆料，話《獨媒》旗下嘅《屯敍》喺未經佢同意下，就喺fb刊登佢嘅議員辦事處為取閱點。於是，巫堃泰就澄清話當日係以為《屯敍》畀佢睇返之前接受訪問嘅內容，先會收低嗰疊唔同期數嘅《屯敍》，並指「不少機構都會將數以十計的刊物寄到議員的聯絡地點，但寄了絕對不等同是取閱點。假如《屯敍》或香港獨立媒體網絡有限公司認為，將刊物給了我就等同成為取閱點的話，那就來得牽強」。
巫堃泰又忽然重視議員做嘢程序咁話，《屯敍》入面有地區廣告，有可能影響辦事處申領區議會營運開支，所以佢將所有《屯敍》寄返畀《獨媒》，實行眼不見為淨。
其實《屯敍》不過係巫堃泰狠下心腸同《獨媒》決裂嘅導火線，因為巫堃泰自爆6月宣布唔參與違法「初選」後接受《屯敍》訪問，時間長達個幾鐘，內容亦談及點解唔參與「初選」，但結果見報時得嗰幾段仔，反而參與違法「初選」嘅朱凱廸同張可森就每人兩頁訪問。佢就企上「道德高地」，話媒體就算有立場都要守住操守同道德，以免淪為「文宣」喎，「訪問過我後於特刊或《屯敍》刊載的相關內容，實在與我一個多小時內提及的內容完全不成比例。更甚的是，關於『初選』問題的內容，完全沒有提及……對於《屯敍》及香港獨立媒體網絡有限公司編輯、取材及處理決定，我是難以認同的。」
拒《獨媒》再訪問或查詢
既然都鬧到呢個份上，巫堃泰乾脆直接落逐客令，「經歷上述一切，令我難以認同《屯敍》是一份社區為本的媒體，亦令我難以再接受香港獨立媒體網絡有限公司的訪問或查詢。」
譚凱邦「感同身受」鬧不公
面對巫堃泰嘅決絕，「新民主同盟」荃灣區議員譚凱邦亦留言話「感同身受」，「我也接受了《屯敍》個多小時的訪問，但最終只是出左（咗）一段。果（嗰）幾版全是朱凱廸及張可森，的確是不公平。」網媒《輔仁媒體》總編容樂其就直誇佢係「大丈夫」。網民「Wing Chu」亦撐巫堃泰話︰「你絕對做得好，遇別（到）不公，應勇敢說出來，你是你，不必隨波逐流，任人魚肉！」唔知只係肯用幾段嚟報道巫堃泰嘅《獨媒》會唔會理佢呢？■香港文匯報記者 郭家好
