【網議政事】攬炒派嗌建東九線 「黃絲」：說好的抵制呢﹖
喺修例風波期間，攬炒派針對配合警方執法的港鐵，不斷惡意抹黑以至鼓吹罷搭港鐵。不過，所謂「口中說不，身體很誠實」，觀塘、黃大仙及西貢區議會近日分別通過動議，話要一齊爭取政府開展興建東九龍線鐵路項目，包括約見運輸及房屋局局長，仲要採取聯合行動云云。唔少九龍東攬炒派區議員喺facebook發布呢個消息後，有「黃絲」就質疑話：「說好的抵制『黨鐵』呢？」不過，不如問吓「黃絲」有冇搭港鐵先啦！
為配合東九龍半山彩雲道、佐敦谷以及安達臣道等發展計劃，多年前《鐵路發展策略》建議興建一條長約7.8公里嘅東九龍線，鐵路擬定由鑽石山出發，連接彩雲、順天、秀茂坪、寶達及寶琳站。然而，運輸及房屋局局長陳帆早前透露，港鐵已經完成東九龍線報告，但由於鐵路連接嘅線路過斜，唔適合列車行走，因此港鐵會研究新技術，尋求解決方案，希望可以突破技術上嘅限制。
局長都講到明條路過斜，唔適合列車行走，要交畀港鐵研究新技術，但攬炒派區議員就死?唔放。觀塘、黃大仙及西貢區議會近日分別通過動議，要求政府開展興建東九龍線鐵路項目，而喺fb發布呢個消息，包括由25個黃大仙區攬炒派區議員共同經營嘅「黃大仙聯合議政」，觀塘區議員胡志偉、梁翊婷、梁凱晴及張敏峯等。
網民問梁凱晴做乜打臉自己
由於呢班攬炒派區議員之前「反港鐵」反到出晒面，突然間又話支持港鐵起多條線，當然會被「黃絲」質疑佢哋係咪跪低咗。「Edward Tsang」問：「說好的抵制『黨鐵』呢？」「Joe Lam」問梁凱晴做乜打臉自己，「搞咩發展『黨鐵』呀女。」
所謂「有求就有供」，攬炒派區議員上任以來只顧討好「黃絲」，現在講要增建鐵路，證明其實唔少口中講「罷搭港鐵」嘅「黃絲」身體好誠實啦！有攬炒派中人就話，佢哋所要求嘅東九龍線鐵路項目，係要另外搵人做，唔畀港鐵做喎，咁都得？
「黃絲」質疑攬炒派議員離地
有相對理性嘅「黃絲」就質疑呢班攬炒派議員離地。「Enuj Woowoo」說：「其實理性啲諗，地型（形）真係唔可行。」「Sandy Lam」亦話：「唔係玩緊模擬城市，係現實中要顧及地形、地質、還有本來密密麻麻的大厦（廈）下的地基和各種管道。」「Lsha Sha」更道：「如果慈（雲）山起（港鐵），大家要有心理準備，由工程開始至完結，嗰啲打地基打到你屋企幅牆有裂痕、沉降、漏水……你睇慈（雲）山條行人天橋一起完咁快漏晒水就知幾出色啦！」
■香港文匯報記者 郭家好
