【網議政事】蟲泰食美心蛋糕 「黃絲」「熱狗」互開波
「黃絲」凡事帶住仇恨嘅眼光嚟睇嘢，搞到香港立立亂。「熱血公民」立法會議員鄭松泰（蟲泰）日前喺facebook貼出自己對住生日蛋糕許願嘅相，有網民就即刻發現嗰個係美心西餅嘅蛋糕，即時走晒去鬧蟲泰支持「藍店」，仲話從此唔會當佢「民主派」。蟲泰就直接話啲「黃絲」不可理喻。「熱狗」為咗護主，都紛紛大讚美心啲蛋糕好味，仲寸返啲「黃絲」︰「轉頭咪又繼續淘寶。」
蟲泰喺fb貼張生日蛋糕相，有人瞬間認得係美心嘅蛋糕，問佢係咪美心，蟲泰都直認︰「係啊，好食。」一句就辣着啲成班「黃絲」。
「Ching Ching」就留言大鬧︰「你生日當然有自己選擇，但咁多嘢唔㨂（揀），要揀美心，係唔多明攞（囉），事關我以前都會當你係少少『民主派』，而（?）家唔係了。」仲有人喺連登討論區開post公審佢。有啲人就話「熱狗」不嬲小學雞，你愈叫佢唔好做，佢就愈要做。
鄭：點解黃絲咁不可理喻
咁蟲泰又真係愈俾人鬧愈唔會驚嘅。佢過咗一陣又喺fb出post話，「我親身證實一次，點解『黃絲』大部分時間咁不可理喻」，仲話啲留言「好歡樂」。
佢又反問係咪要打千字文去回應「呢類指訴（控）」，仲似是而非咁話︰「今日我生日，梁君彥決定不開展譴責許智峯的議案，決定5點半休會。你一定會問，同我有咩關係？係囉，無架（㗎）。智力門檻：90。」
「熱狗」副主席鄭錦滿就話個蛋糕係佢買嘅，仲話「黃絲」唔妥美心創辦人之女伍淑清反暴力嘅立場，但佢喺美心集團「只係間接持有美心0.17%股份，仲要唔係公司董事！……為咗一個咁細嘅股東去杯葛一間養咁多香港人嘅港資集團？仲有，美心對員工唔差，問吓身邊打美心工嘅朋友吧！」
唔少「熱狗」都出嚟護主。「Kasper Tang」直言：「美心會肯俾（畀）慈善機構拎每晚賣唔走嘅麵包轉贈，唔好話我黑心，肯定大把所謂黃店麵包都唔會肯咁做。」
「Stephanie Pun」就揶揄：「其實好想問依（）家黃絲係唔係仍然冇搭港鐵？」「Ting Fung Fung」寸道：「黃屍×人食美心，轉頭就上淘寶。」 ■香港文匯報記者 甘瑜
