不滿黃世澤亂噏 黃之鋒：要檢視吓「同路人」
「黃絲」嘅智商真係無「上限」。前「香港眾志」創黨主席羅冠聰因為長期鼓吹「港獨」而備受英美青睞。現居德國嘅攬炒派「時評人」黃世澤就話，羅冠聰咁受英美重視，係因為佢「打機好叻」，日後可以「畀佢指揮無人戰鬥機」。咁「深奧」嘅論述，連前「香港眾志」秘書長黃之鋒都話「睇唔透」，更令佢訝異嘅係呢條片喺YouTube都有5萬點閱數同3,000個正評，嚇到佢都話：「我地（哋）有時都要檢視一下（吓）『同路人』到底又傳遞緊乜野（嘢）訊息比（畀）公眾。」
亂噏揸無人機「千里之外」殺特首
此前被一眾「黃絲」指控賣口罩唔交貨、呃「手足」錢嘅黃世澤，個YouTube頻道擁有逾8萬追蹤者。佢早前就喺YouTube頻道向「黃絲」解釋咗英美「選中」羅冠聰嘅重要原因：羅冠聰除咗係個「有理想」嘅年輕人，仲係一個「打機好叻」嘅電競評述員，所以日後美國就可以搵羅冠聰做「無人戰鬥機嘅指揮官」，又話香港啲「手足」如果打機叻，都可能美國都會畀佢揸架無人戰鬥機，喺「千里之外」殺死香港特首喎。
「係咪日本仔畀部高達我揸？」
呢段腦洞大空嘅言論令黃之鋒非常困惑，佢話估唔到有「黃營」Youtuber可以講得呢種「級數」嘅推論，又諗緊自己咁鍾意砌高達，「係咪遲下（吓）日本仔又會研發部高達比（畀）我揸？」
講完反話，黃之鋒都好似抽咗口涼氣：「當我地（哋）笑緊『人一藍腦便殘』既（嘅）『藍絲』Youtuber，我地（哋）有時都要檢視一下（吓）『同路人』到底又傳遞緊乜野（嘢）訊息比（畀）公眾」。言下之意，莫非黃之鋒都承認自己啲「同路人」腦殘晒？
「黃絲」藝人杜汶澤不滿黃世澤亂咁噏：「邊×個黎（嚟）架（㗎）？」荃灣區議員岑敖暉就話：「我頭先忍唔住想像，究竟睇緊你（黃之鋒）打gvg（遊戲團隊戰）既（嘅）時候，佢個腦會係諗緊乜……」灣仔區區議員梁柏堅就「幫」黃世澤解答：「軍事訓練囉！」
「KH Doe」就好擔心：「我成日覺得佢xUP（×噏）……但我老母好鐘（鍾）意睇……」「Kitty Mok」都話：「我啲同學集集都有睇……點算。」「Tracy TY」就解釋點解咁嘅片都有咁多「黃絲」讚好：「知唔知點解佢啲comment（評價）都係正評？因為一有unlike comments（負評）佢就會blocked（封鎖），話人係『藍絲』、『5毛』。」
網民反寸：唔好五十步笑百步
「Chor Kiu Lo」就話：「黃世澤講嘢係有啲誇張，但係黃之鋒你自己成為歐洲笑話你自己又知唔知呢？人哋德國話你本身個人有解離主義呀，麻煩唔好五十步笑百步啦。」 ■香港文匯報記者 鄭治祖
