【網議政事】黐唔黐「飯民」資源﹖ 兩「獨人」未夾口供
「抗爭派」係咪投機分子？用錢一試就知。早前全方位無死角咁狙擊傳統「飯民」嘅「抗爭派」，喺成班「飯民」議員宣布延任就變咗「消失派」，結果被質疑佢哋因為名利而向「飯民」投誠。曾經同「飯民」就延任問題搞辯論嘅「獨派素人」劉頴匡同鄒家成就急急出嚟撲火，聲稱「飯民」已經同「民主派」愈走愈遠，但雙方對議會資源嘅取態就完全相反，唔知係做戲定又內訌呢？
民主黨議員林卓廷早前喺宣布延任嘅記者會上，被問到會唔會作出捐薪津、請「手足」同「影子議員」呢啲實際承諾，林卓廷當時就話好多議員同事都有用薪津幫助緊「手足」，至於議員嘅責任應該由佢哋自己承擔，唔應該推卸畀人喎，但就冇講到嚟緊一年有咩「財政計劃」啦。
出乎意料嘅係，最先提出搞「影子議員」嘅劉頴匡遲咗近一日半先喺facebook回應，而且成篇文疑似幫緊「飯民」護航，事關佢雖然有鬧延任嘅「飯民」一意孤行，但就講到：「我對『泛民』的議會表現不抱任何期望，而責任本來不在他們，責任應該在於制度。」
劉頴匡：應將資源投放「抗爭」
劉頴匡仲話，延任嘅議員應該將議會資源投放喺整場「抗爭」，包括支援在囚「手足」同佢哋嘅家屬，亦要為未來嘅「抗爭」提供物資。
事實上，劉頴匡早前同林卓廷「辯論」嗰陣，不斷認同林卓廷講嘅嘢，又大讚對方「好認真、好有心」，兩邊陣營十足飲咗「和頭酒」咁，加埋今次呢篇聲明，似乎「抗爭派」真係轉咗軚喎。
鄒家成：冇要求「飯民」共享資源
不過，喺另一場「辯論」鬧林卓廷鬧到面紅耳赤嘅鄒家成就唱反調，話自己從來冇要求同延任嘅「飯民」議員共享資源喎，仲話佢睇完嗰啲「抗爭派」西瓜靠大邊或「痴（黐）『泛民』」嘅言論感到「極之詫異」。
撐「飯民」延任嘅「Anthony Lai」就忍唔住鬧劉頴匡：「你試吓一邊鬧人一邊要對方畀錢你使，你自己都唔會啦，點解要咁樣要求『泛民』？」「Yun Chan」就回覆：「冷靜啲，呢條友其實冇點鬧『泛民』，根本喺度做戲，實際上佢哋蛇鼠一窩。」
不過每次講到呢啲話題，總有人出嚟做和事佬，好似「Martin Tse」就話：「大敵當前又唔團結搞斗（鬥）『黃』搞鍋（窩）內斗（鬥），用下（吓）個腦啦好心！」「SN Fat」就反指：「無謂再為團結而團結了。勸唔到『同路人』回頭是岸，即係鬼頭仔啦，割蓆（席）啦。」
「Choi Yuk Hei」就話：「你地（哋）唔借呢次『泛民』食相畢露，開足火力××佢哋，呢一世都唔使旨意可以取代佢地（哋）」。「Hamlet Chiu」就話：「咪又全部都係為錢，有錢你方（慌）你哋唔會留任咩！」
■香港文匯報記者 鄭治祖
