【網議政事】傻根淘十蚊月餅盒 扮自家高價搵笨
「青城派國師」傻根（陳云根）嘅高見真係令人永世難忘，最經典嘅莫過於君子之道就係唔好斷佢米路。事緣中秋佳節臨近，由傻根擔任主席嘅「香港復興會」就大推月餅訂購，結果被網民踢爆啲月餅包裝盒其實係淘寶貨，仲回帶話傻根喺前年年宵已經試過將淘寶貨扮原創貨呃錢，估唔到佢衰過一鑊都仲咁厚臉皮。不過，所謂橋唔怕舊，最緊要受，望住一堆「黃絲」搶住幫襯傻根，睇嚟佢又成功掠咗「同路人」一大筆嘞。
話說前年《熱血時報》嘅年宵大縮皮，除咗由維園縮到去旺角花墟，連啲貨都係極平嘅淘寶貨，如果唔係網民踢爆，呢啲用「國師陳雲出品」為名嘅貨品應該呃到唔少人，好似盛惠六草嘢一隻嘅「戰鬥碗」，其實喺淘寶最平只要個半人民幣就有交易，咁計法賣一隻碗可以賺近40倍。
周子峰做埋調查踢爆
本來今次用「香港復興會」個名賣月餅應該冇人狙擊，弊在傻根樹敵太多，去到邊都出事。事緣香港樹仁大學歷史學系助理教授周子峰近日喺facebook貼文話，佢有個做設計嘅朋友被某「青城派」成員批評啲設計因循苟且，對方又褒到傻根啲出品「無得頂」，所以佢哋決定多啲觀摩大師嘅設計：「點知當堂嚇一跳，然後得啖笑……大家覺得係風雅高檔，定係淘寶老人再現，自行判斷。」
周子峰仲好熱心咁貼埋淘寶網搜尋頁面，啲貨品果然同傻根牌月餅嘅包裝盒一模一樣，最平唔使10蚊人仔就有交易。雖然個盒就唔包月餅嘅，但傻根牌一盒四個嘅月餅訂購價都要168蚊到198港幣，睇落都幾好賺㗎。再望吓「香港復興會」個訂購post，果然大批「黃絲」捧場，個post前日仲更新話由於反應熱烈，訂購暫時截單！
有人盲撐自然有人清醒，網民「Gary Kwan」就話：「陳雲根只係用×吹洗腦，不停話買淘寶係死罪，班信徒信到足，咁陳雲根就自己淘寶，再高價賣比（畀）班傻仔。咁就以為過到骨。」「航天元」就揶揄：「問問老師（傻根）幾時攝紙仔入去個餅度。」「Shek Chan」就回應：「係咪寫戶口號碼？叫人課金？」「Sam Lau」就叫大家對傻根公道啲：「可能就係國師放上淘寶賣呢。」
網民回帶曾寸Cheap禎着淘寶貨
「William Lui」就回帶摷到傻根曾經寸「青症」前成員Cheap禎（游蕙禎）某次着嘅旗袍係淘寶貨色，雖然上年年宵傻根已中咗回力鏢，但睇怕佢唔介意中多次喎。■香港文匯報記者 鄭治祖
