【網議政事】激進區員追打乳鴿 譏唔識何謂「代議士」
中西區區議會日前通過擔任「香港同志遊行2020」嘅支持機構，「抗爭派」仲乘機追打傳統「飯民」。事緣當日「抗爭派」議員彭家浩同梁晃維喺會議上提出「本會支持香港就《性傾向歧視條例》立法 」臨時動議，點知部分鴿黨（民主黨）區議員認為唔符合程序公義，應該先游說市民，所以提出修正，引嚟「抗爭派」極力反對。彭家浩事後仲喺facebook出千字文鬧鴿黨，話呢個動議只不過係作鮮明表態，唔明點解鴿黨咁都唔肯做，認為佢哋唔明乜嘢叫代議士喎。
彭家浩話，本身佢同梁晃維提出「本會支持香港就《性傾向歧視條例》立法 」臨時動議，點知鴿黨班區議員就意見多多，「部分民主黨議員聲稱雖然支持《性傾向歧視條例》立法，但不認同在此文教會會議以臨時動議形式表態，而應該寫一份討論文件去諮詢，遊（游）說不同立場的居民，原因是《性傾向歧視條例》立法具爭議性，香港未有廣泛共識。」
鴿黨區議員之後將動議改成為「本會要求政府作公開諮詢，支持香港就《性傾向歧視條例》向立法會提出立法要求」，彭家浩、梁晃維同何致宏梗係唔順氣地投下反對票。
彭家浩事後就鬧鴿黨，話明白正常草案要立法嘅話係要展開諮詢、走程序，但佢哋其實「只希望可藉此表態」，質疑鴿黨話︰「那（哪）為何不直接現在在區議會作鮮明表態？……想不到性小眾議題比起『五大訴求』，各位神經更敏感。」
批拒承擔「代議士責任」
其後，佢又教訓長期大把人做區議員嘅鴿黨唔明白乜嘢叫「代議士的責任」，「民意並不是政治人物或決策領導人作決定的唯一依據……大眾認為與你想法和價值觀符合的話，他們自然會投票給你，而絕非迎合民意以求當選。……我們身為區議員，從政者就是要帶動社會支持普世價值，利用區議會平台引起公眾關注和表態。」
學聯前常委、「抗爭派」張朗軒亦喺facebook度問：「邊個民主黨黨員？又要招呼？ 我去當區拎大聲公架（㗎）。」
乳鴿反責唔熟程序
不過，其中一個鴿黨區議員伍凱欣就主動喺facebook度回應事件，教返班「抗爭派」點做代議士。佢話鴿黨議員係支持《性傾向歧視條例》立法，但唔同意喺其他事項提出臨時動議方式表決，「我們認為即使支持立法，也應提交正式討論文件，陳述支持立法的理據，說服公眾，並讓公眾知悉議會有此討論，才正式作出表決……正正就是作為代議士，我們應謹言慎行。正正就是作為民意代表，我們更應尊重市民也有表達的權利。」不過就冇乜人理佢個回應囉。 ■香港文匯報記者 鄭治祖
