【網議政事】「將民關」爆內鬨 四要員退黨
唔妥柯耀林「扮大佬」積怨 攞盡着數伺機割席
「將軍澳民生關注組」四人噚日宣布退黨，包括召集人葉嘉榮及西貢區議員王卓雅、李賢浩同李嘉睿，令本來就人丁唔旺嘅「將民關」進一步萎縮，家剩返主席柯耀林同執委陸平才等幾丁友。有喺西貢服務開嘅老友話，四個後生退黨唔出奇，因為幾個人就係為咗區選同地區資源先加入「將民關」，家做晒議員、着數攞盡，加上柯耀林鍾意「扮大佬」，於是就借住柯耀林助理陳展浚將西貢區議會嘅搓手液攞去東區派，違反區議會指引一事，趁機退黨割席啦！■香港文匯報記者 杜思文
柯耀林係「將民關」主席，養咗一班細嘅。嚿年區議會選舉，民主黨搵咗連續在四次區議會選舉中落敗嘅莊榮輝去選將軍澳都善選區，但就同喺區內打躉嘅「將民關」成員李栢棠撞到正，結果打晒交。莊榮輝去信民主黨中委會投訴柯耀林，話佢違反黨規打住「雙牌頭」，有利益衝突之嫌，仲篤佢用民主黨嘅資源，聘用上次區選退出該黨、現為「將民關」成員嘅陳展浚，要求佢退黨。一輪大龍鳳後，柯耀林同民主黨其餘50幾個民主黨黨員退黨，仲狠插莊榮輝嘅後台、民主黨立法會議員林卓廷。
借柯助理掀醜聞落井下石
好嘞，區議會選完，「將民關」幾個「素人」當選，開始睇唔起「大佬」。話說柯耀林嘅助理陳展浚，上星期喺筲箕灣派西貢區議會購買嘅搓手液，違反區議會撥款指引。喺區議會會議討論有關問題時，柯耀林雖承認涉案者係佢助理陳展浚，但就否認該批搓手液係由佢提供。
唔少攬炒派區議員感到憤怒，更有人支持報警調查。區議員葉子祈仲擺埋街站「為民請命」，誓要追查「西貢區議會失竊事件」，話希望調查清楚有無機構或議員將物資外流畀陳展浚，如果無就當盜竊處理。佢個帖子仲加埋「政黨老鼠」同「吱吱」嘅標籤，睇嚟係暗示「將民關」偷嘢喎。
事件曝光後，「將民關」四人噚日同時喺facebook發布退黨聯合聲明，話區務繁重無暇兼顧會務工作，加上「組織內有不少的矛盾至今仍未解決」，故即日散水。
點解四人會揀即時「割席」？有喺西貢區服務多年嘅老友分析話，其實「將民關」嘅人只可以「共患難」，無得「同富貴」嘅。嗰批為咗區選先加入「將民關」嘅人，家做晒議員、數攞盡，咪趁「將民關」個朵「臭晒」而擇機退出。
加上柯耀林向來鍾意「扮大佬」，但衰在喺年輕人當中嘅人氣唔高，而且佢早前動議將公園改名為「陳彥霖紀念公園」、「周梓樂紀念公園」，俾「同路人」鬧爆食「人血饅頭」，所以照睇今次嘅退黨行動，都應該唔係四人嘅臨時決定喇。
柯稱「磨合問題」扮無嘢
柯耀林就仲好嘢，噚日接受傳媒採訪時就扮無嘢，話四人未向佢解釋退黨理由，估計係「人與人之間有磨合問題」。
