黃家族聞歌發狂 屈黃店扮黃打人
「黃色經濟圈」又双叒叕開片，日前一個叫「Jacky Lee」嘅網民喺攬炒派facebook群組「沙田之友」度發文，話佢一家人去沙田瀝源邨嘅「黃店」「時新車仔麵」食下午茶嗰陣，因為店入面播緊譚詠麟嘅歌，於是佢阿媽就開始發爛渣，質疑個老闆係「偽黃」同「假黃店」，之後又話老闆發晒脾氣想衝去打佢阿媽，仲將段片放上網。有自稱當日在場嘅網民踢爆，明明係佢父母先係死纏爛打嗰個，話「黃鬥黃」好心傷喎。
喺「Jacky Lee」講嘅版本中，一邊話「時新車仔麵」老闆一定唔係「僞黃」，但一邊又話當日佢帶父母去食下午茶時，佢阿媽不斷聽到店內播譚詠麟嘅歌，於是向店員投訴，但未處理到。後來，佢阿爸就直接去搵老闆，老闆稱聽唔到播歌，「呢d（啲）歌係YouTube循環咁播」，於是佢阿媽就開始發爛渣，質問老闆係咪「偽黃」同「假黃店」。
「Jacky Lee」稱︰「老細聽到『假黃店』呢個term（詞），即刻發曬（晒）脾氣，甚至冲（衝）過去想打我家母，家父肉身擋住，即刻拎手機出黎（嚟）拍片」，仲一度將段片放上網。
好多網民隨即留言話個老闆做得唔啱。「MiChael Chan」就話︰「我覺得兩老好啱、勇敢，如果聽譚永（詠）淪（麟）睇TBB都可以叫黃，咁我不如去食美心？仲乜幫襯你？」聽咩歌都有規定，幾咁「民主」呢。
Youtube排播譚詠麟 黃婦即失控
但有一個叫「Wai Tang」嘅網民自稱當日在場，「真係估唔到個版本變到咁嘅，我就喺角落頭飲住杯嘢。」佢話，當日老闆行出嚟後「Jacky Lee」阿媽就不斷潑婦罵街，雖然老闆講咗好多次唔好意思，「只係你媽媽係咁鬧人哋，之後你阿媽出咗門口企喺門口度係咁鬧，話老闆係『扮黃』呢間係『偽黄店』，老細先走出去門口鬧你哋……播錯歌咪同人哋講囉唔需要咁樣嘅係咁鬧人哋『扮曬（晒）黄』，好傷人地（哋），咁樣比『同路人』鬧。」
俾人大腳踢爆，「Jacky Lee」先改post澄清，話係「家母聽見譚詠麟d（啲）歌燜（忟）曬（晒）， 可能態度唔好，質疑是否黃店，引起爭執，藉此向老闆道歉」喎。「Wai Tang」就認為咁講唔夠︰「你應該再次澄清老闆從無喐（郁）手想打你媽媽。」算啦，「黃絲」平時成日屈人唔認數，肯承認一半錯誤已經算係咁㗎啦。
■香港文匯報記者 郭家好
